Minister Ursell Arends:
Minister Arends ta felicita Parke Nacional cu nan workshop encuanto maneho marino na Aruba y den Caribe. Pa varios aña, Aruba a pone prioridad riba desaroyo economico cu a perhudica nos naturalesa. “Nos tin e ambicion pa amplia e actual parke marino na uno cu rondona ful nos isla”. Esaki ta forma parti di su vision di planificacion pa e uzo du nos lama.
Un Parke Marino cu ta rondona nos isla, en bez di prohibi actividadnan, lo crea un roadmap pa con nos por balansa e uzo di nos lama y e conservacion di nos naturalesa. Pa es motibo, Aruba a haci un compromiso boluntario durante e conferencia di Lama di Nacion Uni na juni 2022 pa amplia e Parke Marino.
Como un isla dependiente di importacion y turismo, nos ta uza nos lama pa varios actividad e.o. transporte maritimo, watersport, pesca y construccion sin fin. Dicho actividad por a expande sin limitacion y sin input di e varios stakeholders marino. Sinembargo, actividadnan riba lama por crea conflicto y tin un impacto grandi riba nos bida marino. Un Parke Marino y maneho efectivo por limita algun efecto dañiño. Alabes, e proteccion di nos recurso y especie marino ta rekeri un bista amplio di comienso te fin di e ciclo di awa (source-to-sea) unda fuente di polucion y otro daño por ser mitiga.
Minister Arends ta enfoca riba riba varios aspecto pa e proteccion di naturalesa, especialmente ribe e Derecho di Naturalesa y Derecho di nos Lama. Naturalesa tin su atencion y por mira esaki den e esfuerso pa sera Dump Parkietenbos, instala un RWZI nobo na Bubali Plas y stimula sector di procesa desperdicio. Pero esaki ta solamente un parti di mitiga daño, nos mester educa nos comunidad pa asina respeta, conserva y proteha nos naturalesa y recurso natural.
Minister Arends ta orguyoso di por a habri e workshop tocante maneho marino y ta felicita Parke Nacional Aruba y DCNA pa realisa e evento aki. Minister Arends ta desea un encuentro educativo unda participantenan local y internacional por intercambia conocimento.
