Durante aña 2025, prijs promedio di HFO / fuel oil a baha cu aproximadamente 25% na nivel internacional. Esaki ta un hecho conoci den sector di energia, y un desarroyo cu normalmente mester a traduci den costo mas abou pa produccion di awa y coriente.
Sinembargo, te awe dia di awe, pueblo di Aruba no a mira ni un solo porciento di bahada den precio di awa y coriente cu ta wordo cobra pa cas y negoshi. Esaki ta lanta un pregunta serio y preocupante:
cu tur e reduccion riba fuel, kiko ta pasando cu e placa di WEB Aruba N.V.?
Si costo principal pa produci coriente a baha cu 25%, y si WEB Aruba N.V. ta continua cobrando mes prijs halto, naturalmente pueblo tin derecho di sa:
Unda e diferencia di e placa ta bay? Ta wordo reinverti? Ta wordo gasta atrobe? Of simplemente ta laga pueblo paga mas, sin splicacion?
E situacion aki por wordo mira como un acto brutal contra e consumidor, un accion cu ta pisa mas riba hende cu ya ta lucha pa paga costo dj bida caro na Aruba. Transparencia no ta un luho, e ta un obligacion.
Pa e motibo aki, nos ta haci un yamada publico na lidernan y persona cu influencia politico y social, manera Gerlien Croes, pa sali dilanti y duna splicacion cla na pueblo:
Kico ta pasando cu e finanza di WEB Aruba N.V.?
Dicon no tin ni un alivio pa consumidor despues di un bahada tan significativo den costo di fuel?
Pueblo di Aruba merece contesta, no silencio.
Awa y coriente ta necesidad basico, no un luho. Ora costo ta baha, prijs pa pueblo mester baha tambe.
WEB Aruba N.V., e bala ta den bo scochi. Transparencia y responsabilidad no por keda atras ni keda warda ora boso “da la gana”.
