Un Grupo di Arubiano cu tabata na Los Angeles a pasa den sorpresa y problema hopi grandi cu United Airlnes. Na momento cu nan mester check in pa bini Aruba, United Airlines na Los Angeles, contra tur regla, a nenganan di subi avion, pasobra nan no tin un PCR test di Covid. Na un manera hopi grocero, a keda exiginan pa bay haci un PCR test, pero obviamente cu den 3 hora prome cu e vuelo lanta, ta imposibel bay haci un PCR test.
Manera ta bon conoci, tur Arubiano por bolbe bek Aruba y por haci un test na Airport di Aruba. Pues e prohibicion aki di United a causa e grupo hopi problema. Nan mester a acudi na Jet Blue pa cumpra tur ticket di nobo, unda cu Jet Blue si a laganan subi avion.
Pues nan a perde nan ticket di United, a perde nan anochi di hotel na e cuidad di coneccion y perde nan car rental na e cuidad di coneccion. Nan mester a keda oranan largo den airport, pa asina por a aborada Jet Blue Diasabra pa yega Aruba diadomingo.
E maneho di United aki ta completamente robes y ta perhudica cualke Arubiano cu escoge e aeroliña ey. E grupo a pidi pa Minister concerni y ATA, pa atende esaki cu United.
