Diaranson mainta, Minister di Relacionnan di Reino, Educacion, Hubentud, Innovacion y Deporte, mr. Gerlien Croes, a realisa un bishita oficial na Universidad di Aruba. Durante e bishita, Minister Gerlien Croes a tene un dialogo constructivo cu e College di Universidad, den cual a papia riba varios desaroyo cu ta tumando luga na Universidad di Aruba.
Durante e reunion, Universidad di Aruba a duna un splicacion amplio di e progreso y innovacion den enseñansa avansa, incluyendo e proyecto relativamente nobo di e facultad SISSTEM, un iniciativa vital pa e futuro digital y tecnico di Aruba cu a financia cu fondo di Union Europeo. Universidad ta sigui inverti den crecemento sostenible y den preparacion di un generacion nobo di lider y profesional den e area cu tin mas demanda.
Minister Gerlien Croes a expresa su aprecio pa e nivel di enseñansa cu Universidad di Aruba ta duna, y cu ta duna posibilidad pa studiantenan sigui nan desaroyo academico na Aruba mes.
Den e reunion a trata tambe topiconan crucial cu mester atencion debido di Gobierno di Aruba, particularmente e necesidad pa re-evalua y modernisa e ley actual cu ta regula Universidad. Ta importante cu e mision y vision di Universidad di Aruba ta refleha e caminda cu e institucion kier bay den e proximo añanan, pa fortalece e rol di Universidad como motor di desaroyo intelectual y profesional.
Minister Gerlien Croes ta orguyoso cu e trabou incansabel cu Universidad di Aruba ta haci, y a subraya cu Aruba por ta realmente orguyoso di e nivel di formacion cu UA ta ofrece na nos hobennan. Ademas e mandatario tin e compromiso firme pa fortalece e laso cu Universidad y pa crea mas espacio pa colaboracion structural den beneficio di futuro educacional di Aruba.
