Si mayor ta papia mentira, ta bira dificil pa e stop su yiu di papia mentira.
Si mayor ta papia palabra malo constant, e yiu tambe ta bin imite.
Si mayor ta parandero, ken ta controla e yiu na cas.
Si mayor ta iresponsabel, e yui tambe ta lanta iresponsabel.
Si mayor ta orguyoso y arogante , yui tambe ta tira pa nan mayornan.
Si mayor ta violento, onbeschoft, y inmoral e yui por copia di dje.
Si mayor ta practica di duresa di curason, y no kier pordona, e yui tambe ta kere cu esey ta bon.
Si mayor ta usando droga y ta bebe tur dia, na unda e yiu lo hanja bon ehempel?.
Den un palabra bisa bo no por para nada, ora bo mes ta participa den dje.
Si bo mes no ta den obedencia na Dios, con bo ta haci trece bo yui na obediencia?
Pa un hende lanta su yiu den bon caminda, e mester duna ehempel cu su propio bida.
Esey ta nifica cu respet, moral y etica mester bini bo mes prome, pa asina bo por exigi di bo yui.
Placa no por reemplasa educacion, pasobra placa ta caba, y ta yega caminda cu placa no por yuda, pero educacion semper lo keda briya y duna bon resultado y bon ehempel.
Bendiciona ta e mayor cu aunke e mes no tabatin e oportunidad di studia y gradua, awe e ta mira con necesario ta pa un mucha bay scol, studia y caba scol, y e como mayor ta para firme pa su yiu cumpli cu esey.
Den 1 Cronicanan 28:9 David ta papia cu Salomon su yiu y ta bise: Pa loke ta abo mi yiu Salomon , conoce e Dios di bo tata, y sirbi’E cu henter bo curason, y cu un alma boluntario,pasobra Senjor ta scrudinja tur curason y ta comprende tur intento di e pensamentonan.Si bo busc’E , E lo laga bo hanj’E,ma si bo bandon’E , E lo rechasa bo pa semper.
Mundo cada dia ta yena mas cu maldad, y nos tur sa cu e maldad ta bini di e maligno, of mihor bisa e diabel, pasobra Dios no ta manda ningun hende haci malo, ni tampoco bay contra e berdad, principio y naturalesa di Dios.Tur esey ta bini door di influencia di e malbado cu ta yena mente y curason di hende y asina hinca nan den e mundo di scuridad.
Hende ta ocasiona caida di otro hende, si bo ta anda cu hende malo, bo ta cay den maldad, mal amistad ta danja tur bon reputacion.
Nos tin e autoridad den nomber di Cristo Hesus pa reprende satanas, pero nos relacion cu Cristo Hesus mester ta bon, pasobra nos mester kere y tin fe den e nomber di ken nos ta papia.
Mas nos practica nos autoridad mas consciente nos ta bira di e poder di Dios.
Pasobra ta Cristo Hesus mes a duna autoridad pa saka demonjo y cura enfermedad .( Lucas 10:16-20).
Den e tempo trabahoso den cual nos ta bibando ( 2 Timoteo 3:1-5) nos mester biba alerta manera e palabra di Dios ta bisa:
Pesey somete boso mes na Dios.Resisti e diabel y e lo huy for di boso,Hala serca Dios y E lo hala serca boso. ( Santiago 4:7).
Corda locual ta para scirbi den 1 Pedro 5:8; Sea sobrio . Sea alerta boso adversario e diabel ta cana rond manera un leon cu ta grunja, buscando ken e por devora.
Usa bo autoridad den Cristo Hesus.
Sinceramente, Pastor Marcel Balootje
