ORANJESTAD – Siman pasa minister Dangui Oduber conhuntamente cu Dvg, Svb, Azv, Ata y Ahata a anuncia e vacuntahon 3.0 cu lo mester tuma lugar diadmomingo 22 augustus 2021. E vacunathon aki tawata hopi importante considerando e e situacion actual di Covid-19 nan Aruba y tambe e demanda cu tin pa vacuna na Aruba.
E situacion actual na Aruba ta hopi tenso. No tin espacio di ICU na nos hospitalnan, tin un grand cantidad di patient cu Covid ta wordo manda Colombia y nos hospital ta bao di un presion enorme.
E data cu nos ta ricibi for di hospital ta indica cu mas di 81% di esnan hospitalisa no ta vacuna. Esaki ta un indicacion cla cu e vacuna ta duna resultado cu nos ta buscando. Den fin di siman gobierno mester a escala varios medida na momento cu hospital a bat alarma. No a keda nos otro, aunke con dificil e decisionan por ta, pa introduci mas medida pa baha e contagio y baha e presion cu tin na nos hospital.
Na momento cu nos no por garantiza cama mas pa patientnan esaki ta un problema hopi serio.
Nos a haci un yamada na communidad di Aruba pa bai masalmente vacuna y nos ta hopi contento y agardecido cu un biaha Aruba a responde na e yamada pa bai vacuna. For di mainta trempan nos a nota e entusiasmo den nos hendenan pa vacuna y e dia tawata uno hopj fructifero y exitoso.
Nos a pone como meta pa nos por vacuna entre 2000-2500 persona riba 1 solo dia y nos a logra e cantidad di 2195 persona.
Como minister di salud mi kier a gradici di curason un biaha mas cada un persona. Cu a bai vacuna, ministerio di turismo, salud publico y deporte, henter e team di vacuna di Dvg, tur e voluntarionan di Svb/azv, ATA, Ahata y sigur un danki special na Ritz Carlton pa pone nan ballroom disponibel un biaha mas pa logra un otro vacunathon super exitoso.
Ban sigui cuida, ban sigui laba nos mannan frequentemente, ban sigui mantene distanciamento social, ban sigui bisti masks y ban tur hunto den union sali for di e crisis aki. Mi ta convenci cu hunto den union nos lo vence.
