Bo no tin mester di invita envidia y arogancia, nan tey tur caminda, dos mal spirito cu a sali for di fierno, cu tur caminda cu nan pasa ta trece malcomprondemento, rabia, discucion, pleito y hasta violencia, pasobra esey ta nan proposito, pa kibra amistad y bon relacion.
Envidia y arogancia hopi biaha ta domina hende sin nan sa, y tur dia ta hala nan mas den scuridad, y ta pone nan kere cu nan ta superior riba otro hende, cu nan por papia malo, inventa, haci y deshaci y calumnia y lubida cu tin un Dios na cielo cu ta wak tur cos.
Envidia y arogancia ta pone hende rebaha otro, y hasta tin biaha nan propio sernan keri, pasobra e spirito di envidia y arogancia no tin respet pa hende, ni tampoco pa bida di hende pasobra caminda e por hanja e oportunidad e ta destrui, y e ta drenta den tur gremio, tin biaha bo ta mira un hende den posicion halto ta actua stranjo y despues bo ta bay ripara cu ta envidia, no ta politica, tampoco competencia, pero ta puro envidia y arogancia ta domina curason di hende.
Wak kico envidia y arogancia a haci cu Cain, y wak kico e a haci cu Rey Saul, y no papia mes di Rey Herodes cu ora e tende cu tin un Rey a nace a manda mata tur mucha entre sero y dos anja keriendo cu asina , e por a logra mata e Ninjo Hesus.
Awor nos ta mira den e tempo moderno y trabahoso cu nos ta bibando aden con envidia y arogancia ta move bao di hubentud, y bo ta puntra ta ken a sembra tanto envidia y arogancia bao di nos hubentud?
E cos ta hopi fuerte pasobra nan no tin respet pa otro, tampoco tin misericordia, di otro y a keda proba den varios caso cu nan no ta respeta bida di otro.
Pero aunke envidia y arogancia, kier broma y haci grandi e amor di Dios ta derote den tur forma, pasobra asina cu palabra di Dios, mester drenta bida di hende , envidia ta wordo kibra, y si e no wordo kibra e persona ey mester wordo libera, pasobra hasta envidia spiritual ta existi.
Pero e sanger di Cristo Hesus tin poder pa kibra tur envidia y arogancia , y haci hende liber pa nan por stima Dios y stima nan prohimo.
Ma si boso tin envidia amargo y egoismo den boso curason, no sea arogante y asina ganja contra e berdad,( Santiago 3:14-16), Pasobra caminda ta existi envidia y egoismo tin desdorden y tur sorto di cos malo.
Amor tin pasenshi, amor ta carinjoso,y no ta jaloers, amor no ta gaba,y no ta arogante.( 1 Corintionan 13:4).
Ta dificil pa un hende bisa cu e ta stima otro, mientras cu su arogancia, ta pone su boca perde control ,pasobra envidia y arogancia no tin miedo di sali na cla.
Pasobra for di paden,for di curason di hende, ta sali mal pensamento,fornicacion,ladronicia,matamento,adulterio,echonan di cudishi y maldad, tambe enganjo,sensualidad,envidia,calumnia,orguyo y bobedad.Tur esakinan ta sali for di paden y ta contamina hende.(Marco 7:21-23).
Pesey laga nos pone e obranan di scuridad un banda,y bisti e armadura di lus.
Laga nos comporta nos mes desentemente manera den dia, no den parandiamento,y den buracheria,no den inmoralidad sexual y den sensualidad, no den pleito,y envidia. Ma bisti boso cu Senjor Hesus Cristo y no haci provision pa e carni, pa cumpli cu su mal deseonan.( Romanonan 13:8-10).
Furia ta cruel,y rabia ta un diluvio , ma ken por cu hende jaloers? ( Proverbionan 27:4).
Amor ta cura.
Sinceramente, Pastor Marcel Balootje
