Den e dianan aki cu formacion di un gobierno nobo pa Aruba, esaki ta e topico di tur dia den e programa Enfoke. P’e motibo ey mi ta mira e programa, selectivamente, den e dianan aki specialmente pa tur e entrevistanan cu e formadornan. 

Den e programa di dia 15 di januari ultimo mi ta tende sr. Paskel ta duna comentario di con y pakico e gabinete di sra. Evelin Wever-Croes a cay. Mi no ta duna mi opinion tocante su comentario, pero si mi mester bisa cu despues di su reproche posteriormente di sra. M. Raymond, den su splicacion di lealtad di un miembro na su partido, na mi opinion e ta comete un eror. 

Den su splicacion di lealtad sr. Paskel ta haci un eror, pasobra esey ta yega na mente manera cu un parlamentario, desde e momento cu e subi un lista e mester silencia su consenshi y ta leal tur momento na e partido of, si su partido ta den gobierno, n’esaki. E ta un pensamento di nos politiconan – y mayoria dje votadonan – tambe y esey t’e motibo cu nos parlamento, segun mi, nunca a funciona manera ta su deber. Ta berdad cu un miembro mester ta leal na e ideologia di su partido y na momento cu e no ta mas, e mester pidi su retiro. Si su partido ta forma parti dje gabinete e mester ta leal n’e programa acorda pa goberna y no na un ministro o lider di su partido.

Si un minister kier pasa un concepto di landsverordening y Raad van Advies a duna un conseho negativo p’esaki y su consenshi ta bis’e cu e ley lo ta desbentahoso p’e comunidad, ta eticamente su obligacion di yama e ministro y pidi e reconsidera su concepto; y si e ministro ta recalcitrante, e parlamentario, no solamente mester scucha su consenshi, pero tin e deber di vota segun esaki. Nos constitucion ta bisa esey explicitamente cu solamente cinco palabra den Capitulo III, articulo 16, inciso 3: “De leden stemmen zonder last”; “E miembronan ta vota sin molester” Cu otro palabra: e miembronan no mester tin orden con pa emiti nan voto y por haci esey segun nan consenshi. Es mas, nos constitucion no conoce fraccion y ta bisa esey tambe den Capitulo III, articulo 1: “De Staten vertegenwoordigen het gehele Arubaanse volk. Na Papiamento: “E Parlamento ta representa e pueblo di Aruba den su totalidad.” Esey kiermen cu Parlamento – y e miembronan – ta primeramente leal na e pueblo di Aruba.  

Si un gobernante pidi lealtad na su persona, sea peticion na un parlamentario o un colega-gobernante, nos constitucion y democracia ta na peliger. Ehempel dj’esaki tin hopi den nos region.

Atentamente,

Vivienno “Vi” Frank Sr.  

Tanki Flip 52 A,

Aruba