Diasabra 30 di april, cu ta e dia cu Papa Francisco a beatifica dr. Jose Gregorio Hernández aña pasa, tabatin un santo  sacrificio di misa solem pa 5’or di atardi na Pro-Catedral San Francisco di Asis na Playa pa tur devoto, contribuyente y pueblo en general.

Durante di e santa eucarestia, nos Vicario Episcopal, pastoor Andres, den un bunita ceremonia, a bendiciona e relikia di beato dr. Jose Gregorio Hernández, cu a wordo manda di Venezuela pa pueblo di Aruba. Esaki a tuma luga den presencia di diferente otro pastoor,  diacononan y publico presente, bou di canto di coro Santa Famia. Pa e ocasion aki tabata presente tambe pastoor Jan Gospodarczyk di parokia di Tanki Leendert, bou di cual e Sitio di Oracion di dr. Jose Gregorio Hernández ta cay.

Despues di e santa misa un parada di auto, bou guia di polis, a sali pa e Sitio di Oracion na Tanki Leendert, caminda basta devoto tabata sperando su yegada. Eynan vicario a enfatisa e importancia di e relikia pa nos pais y despues di bendicion, diacono Theo Zievinger a sigui cu un  ceremonia cortico dedica na beato dr. Jose Gregorio Hernández y su relikia, mientras coro ”El Señor es nuestra alegría” tabata compañ’e cu e himno di  beato. Na final a sigui un brindis chikito y diacono Theo a hiba e relikia misa San Huan Pablo II, caminda a ward’e na un luga sagrado.

Nos fundacion ta desea di gradici nos vicario  pastoor Andres y diacono Gibi Kelly, kendenan a haci un esfuerzo hopi grandi pa a yuda nos logra algo asina bunita pa Aruba. Danki na tur persona cu di un forma of otro a coopera cu nos fundacion!

Fotonan: cortesia di Emperatriz Perdomo

LEAVE A REPLY

Please enter your comment!
Please enter your name here