E di 70 edicion di e Festival di Eurovision ta ranca sali awe nochi for di e prestigioso Wiener Stadthalle na Viena. Den e prome semifinal aki, 15 pais lo combati pa logra un di e 10 cuponan disponibel pa e gran final di diasabra proximo. Entre e participantenan, Finlandia y Grecia ta zona fuerte como e faboritonan absoluto, mientras cu e participacion di Israel ta keda bou di un bista critico pa motibo di e tensionnan geopolitico.
E faboritonan pa e ‘Microfon di Cristal’
Segun e casnan di apuesta y e tendencia den rednan social, tin dos nomber cu ta hala tur atencion:
- Finlandia: E duo Linda Lampenius y Pete Parkkonen ta encabesa e lista cu e cancion ‘Liekinheitin’. Nan propuesta ta un mescla innovador di electronica, pop-rock y e toke elegante di e violin.
- Grecia: E artista Akylas a bira viral cu su cancion ‘Ferto’, un presentacion pret y yen di energia cu a cautiva e publico Europeo caba durante e ensayonan.
Tension y protesta rond di Israel
A pesar di e exito musical, e festival ta wordo celebra den un ambiente di tension. Noam Bettan, representante di Israel, ta figura halto den e predicionnan, pero su presencia a genera polemica.
- Motibo di tension: Un boycott pa parti di cinco pais (incluyendo Spaña) a marca e edicion aki como protesta contra e situacion na Gaza.
- Siguridad: Pa awe tardi tin programa un manifestacion den centro di Viena bou di e lema “Ningun escenario pa genocidio”. Autoridadnan ta riba alerta pa evita incidentenan manera esun di aña pasa na Basilea, caminda tabatin boo’s y expulsion di espectadornan.
Detaynan di e anochi
E certamen, cu ta cuminsa pa 9:00 pm ora local (3:00 pm na Aruba), lo habri cu e grupo Moldavo Satoshi. Un dato curioso ta cu nan cancion ‘Viva, Moldova!’ tin letra na seis idioma, incluyendo Spaño, locual ta un rastro raro di e idioma ey e aña aki debi na e ausencia di Spaña.
E secuencia di e anochi:
- Moldavia, Suecia, Croacia, Grecia, Portugal, Georgia.
- Fuera di concurso: Italia y Alemania (miembronan di e Big Four cu tin nan pase sigura).
- Finlandia, Montenegro, Estonia, Israel, Belgica, Lituania, San Marino, Polonia y Serbia.
Cambio den e sistema di voto
Un cambio importante pa e aña aki ta e regreso di e hurado profesional. Despues di tres edicion caminda solamente e publico tabata dicidi den e semifinalnan, awo cada pais participante lo tin un hurado di shete experto (incluyendo dos hoben entre 18 y 25 aña) pa yuda determina ken ta merece un luga den e final.
