Tur aña riba 25 di November ta e dia pa para keto y pensa pakico tin tanto violencia contra hende muhe. Mi a ser acerca un dia pa minister di Aruba riba Asuntonan Social na 2015 cu a bisa mi cu na un Conferencia na Geneve tocante Violencia contra Hende Muhe, nan a ser atendí riba e hecho cu Aruba NO tabatin un investigacion tocante violencia contra Hende Muhe. El a acerca mi pasobra na 2013 mi a entrega na Gobierno di Aruba un investigacion titula: Maneho di Violencia Domestico na Aruba. E investigacion aki tin un capitulo tocante registracion di Violencia Domestico, un capitulo tocante cooperacion di trabou entre e departamentonan concerni y un di tres capitulo titula: comparacion entre Aruba y Hulanda tocante maneho di e problema aki. Na 2016 mi a cuminsa prepara pa haci e investigacion grandi na Aruba tocante Violencia contra Hende Muhe na Aruba
Dicon tin violencia contra hende muhe? Hopi biaha esaki ta basa riba e hecho cu e hende homber ta considera su mes mas importante cu e hende muhe y ta di opinion cu e tin mas derecho. Esaki nos ta yama Patrialchismo basa riba e palabra Patriarlcha cu ta nifica Hefe. Kizas pasobra antes e homber tabata traha pa trece e cuminda cas; e ta esun cu mester a proteha su hogar y ta percura pa tin un dak riba nan cabes. E tabata e cabes di cas y tabata tuma e decisionnan. E hende muhe tabatin e tarea di complace su casa; di haya yui; di prepara cuminda; tene cas limpi; laba paña etc. Esaki ta sosode hopi ainda den paisnan Musulman of Islam, ehempel: Afghanistan, unda mucha muhenan No mag bay scol pa siña lesa of skirbi. Nan mester keda bobo y sumiso.Nan mester bisti paña cu ta tapa henter nan curpa y hasta nan cara.
Di otro banda a lanta e Femenismo cu ta referi na e lucha di e hende muhe pa igualdad di derecho: estudio, trabou, derecho di vota, etc. E prome grupo di hende muhenan cu a lanta exigi nan derecho di vota, a cuminsa na New York y vecindario y tabata casanan di hende hombernan cu tabatin poder como político. Despues e lucha aki a plama na paisnan di Europa. Paisnan di Centro y Sur America, di Africa y di Medio Ambiente, ainda ta sufri bou loke nos ta yama Machismo. Algun hende muhe cu ta bin di casnan di poder manera placa,político,estudio avanza etc tin mas privilegio.
Lo mi presenta algun resultado di mi investigacion cu mi a termina na 2022 y cu a duna mi e titulo di Doctor, especial riba e tereno di Violencia Domestico.
E cuestionario cu a ser traha pa e encuesta tabata den 4 idioma: Papiamento, Spaño, Hulandes y Ingles. 960 cuestionario a ser parti. A ricibi 819 y despues di revision a keda cu 758 formulario yena cu ta un poco mas cu 2 biaha 380 necesario pa e investigacion ta ser considera valido.
Riba e pregunta cuanto ora e hende muhenan ta traha, 444 participante a skirbi cu nan ta traha mas di 40 ora pa siman (58.81%). Ta conoci cu mayoria ta gana sueldo minimo. Den un investigacion haci pa UNICEF (2013) nan ta bisa cu: e hecho cu un hende muhe, casa of no casa ta traha 40 ora of mas pa siman, ta ser considera un factor di risico pa violencia domestico pa motibo di stress y/of cansancio. Y tambe un peliger pa e muchanan pasobra nan ta mucho ora nan so. A trata di soluciona esaki cu Trei Merdia. No ta conoci cua efecto positivo esaki lo tabatin.
Dos remarca tocante diferencia entre salario di homber y casa (partner), di ambos banda: 1. Generalmente esaki ta causa discusion. Si e homber ta gana mas cu su casa, e lo bisa cu e ta esun cu ta trece cuminda na cas y no e señora. Y si e señora ta esun cu ta gana mas placa, e lo laga sa cu ta esun cu por papia mas y 2. Hopi hende muhe NO sa cuanto nan casa/ partner ta gana. Esaki ta un problema grandi pasobra den nos situacion actual unda tur cos ta caro, ta e homber y e señora mester sera cabes pa por paga cuminda, scol, awa, corriente etc. Pleitamento solamente lo haci e situacion pio!
A ser haci tambe un investigacion riba e situacion di biba. Na e Departamento di Asuntonan Social, Seccion y Bida, a constata 11 diferente forma di “hogar”. Mi investigacion a duna como resultado 9 diferente hogar: 1.biba cu mi casa y nos yuinan; 2. Mi ta biba mi so; 3. Biba cu mi casa cerca su mayornan; 4. Biba cu mi casa y nos yuinan cerca mi mayornan; 5.biba cu mi casa y nos yuinan cerca su mayornan; 6. Mi ta biba cu mi mayornan y mi yuinan; 7. Mi ta biba mi so cu mi yuinan; 8. mi ta biba cu mi yuinan cerca un tanta; 9. Biba cu mi casa cerca mi mayornan.
Pa cumpli cu peticion di varios amiga y conocirnan lo mi publica un biaha mas e resultado di mi investigacion tocante Violencia Domestico entre Parehanan cu cua mi a obtene mi doctorado riba 1 december 2024.
Mi lo menciona prome e formanan di violencia psychologica y cuanto di e participantenan ta menciona di ta of a yega di ta victima di e agresion ey. E prome agresion ta Control,. Esaki ta un forma di mustra poder riba e pareha pasobra e ta un forma di Violencia Domestica y pasobra e ta limita e ser femenino den su mobilidad, su libertad di papia cu hende, cu ken e ta desea di papia, pa bishita esun cu e ta desea di bishita y pa e tuma su propio decisionnan
Di 758 respondientenan, 661{87,20%} a reporta cu nan ta of tabata casa of tabatin un pareha pa mas di 5 aña of e ultimo 5 añanan. Di e cantidad aki 346 {52.34%} a yega di sufri un of mas forma di abuso di control menciona ariba. Esey kier men cu di cada 2 respondiente, un a experiencia por lo menos: un forma di abuso di control. E respondientenan tambe mester a indica ken tabata e agresor.
E respondientenan por a scoge entre 1. Actual esposo of pareha. 2. Un {ex} pareha, 3. tur dos, 4. ta prefera di no contesta y 5. No aplicable.
Di e 346 respondiente 69 {19,94%} no a contesta e pregunta aki. Di e resto di e respondientenan {277}, 170 {61.3 %} a menciona nan actual esposo of pareha, 86 {31.04%} a menciona nan {ex}esposo of pareha, 18 {6.50%} a contesta tur dos y 3 {1.08%} a prefera di no contesta.
E di dos set di preguntanan di e seccion aki tabata ‘Amenaza’ di e pareha
Menaza un hende, tambe ta un manera di mustra poder y di mustra kico e persona ey por haci cu su pareha pa oblig’e di obedece y hacie sumiso. E prevalencia di e parti aki a ser midi cu 7 pregunta cu mester a ser contesta cu SI of NO. E respondientenan a ser pidi pa contesta e siguiente preguntanan. Bo por bisa cu ta of tabata berdad cu, 1. El a menaza bo di hacibo dolor {dal bo of herida bo}, 2. El a menaza bo di haci un hende cu bo ta stima {bo mayornan, yuinan, rumannan of miembro di bo famia} dolor, 3. El a menaza di bandona bo of separa for di bo of divorcia bo, 4. El a menaza bo di mata bo si bo lag’e of divorcie, 5. El a amenaza bo di mata un bestia di cas {pet}, 6, el a amenaza bo di kita bo yuinan for di bo, 7. El a menaza bo di manda bo bek pa bo país di origen?
E respondientenan por a scoge entre e siguiente opcionnan: 1. Bo actual casa of pareha, 2. Un {ex} pareha, 3 tur dos, 4. Prefera di no contesta.
Binti ocho {28} di e repondientenan {21.05%} NO a indica e agresor. Un total di 52 respondiente {39,10%} a menciona nan actual casa of pareha como e agresor. 40 {30, 07%} respondiente a menciona nan {ex} partner, 9 {6.77%} a menciona tur dos.
Preguntanan tocante abuso físico leve
E seccion aki ta consisti di 3 pregunta, 1. Lo bo bisa cu tabata of ta berdad cu: 1. El a sera bo de bes en cuando intencionalmente, 2. El a yega di tene bo algun biaha asina duro cu el a haci dolor, 3. El a pusha bo un par di biaha duro contra algo.
Resultado riba abuso físico leve
Di un total di 661 respondiente, 112 {6.94%} a reporta cu nan a yega di experiencia un of mas di e formanan di abuso menciona. Kier men cu un di cada 6 di e respondientenan a yega di experiencia por lo menos un di e formanan aki di IPV.
Mencionando e agresor
Di un total di 112 respondiente, 13 {11.61%} no a contesta e pregunta aki. 50% a menciona nan casa of pareha actual, 43.75% a menciona un expareha y 5.36 % a menciona: tur dos.
Preguntanan tocante Control Financiero
E respondientenan mester a contesta e 4 siguiente preguntanan: lo bo bisa cu ta of tabata berdad
cu, 1. E ta nenga di duna bo suficiente placa pa gastonan di cas, mientras cu tin suficiente placa pa otro cosnan, 2. E no kier cu bo haya informacion di e entrada familiar, ni ora bo puntra, 3, e ta prohibi bo di traha of di tin bo propio entrada, 4. E no ta aproba pa bo tin bo propio entrada.
Resultado tocante Control Financiero
Di 661 respondiente 96 {14.52%} a reporta di a expiriencia un of mas di e formanan ariba menciona. Pa e motibo ey e prevalencia di e seccion aki di abuso di IPV ta 14.52%, kier men cu un di cada 6 di e respondienetenan aki a experiencia un di e formanan aki di IPV.
Mencionando e agresor tocante Control Financiero
Di 76 respondiente, 20 {26.32%} no a contesta e pregunta aki. Un total di 76 a contesta di e manera aki: 44.74% a menciona e casa of pareha actual; 51.32% a menciona un expartner: y 1.32% a menciona: tur dos.
Abuso Psychologico of Emocional
E preguntanan ta lo siguiente: ¨lo bo bisa cu ta of tabata berdad cu a. el a insulta bo of a haci bo sinti malo di bo mes, b. el a humiya bo dilanti di otro hende, c. el a haci cos pa spanta bo of intimida bo pa malo, dor di e manera cu e ta wak bo of grita bo of kibra cos, d. el a menaza bo di haci bo daño of un persona cu bo ta stima.
Resultado di Abuso psychologico of Emocional
Di 661 respondientenan 253 {38.28%} a contesta cu nan a experiencia un of mas di e formanan menciona ariba. Esey kier men cu mas o menos un di 3 di e respondientenan a experiencia por lo menos un forma di e IPV abuso aki.
Mencionando e agresor
E respondientenan a contesta di e forma aki: di 253 respondientenan, 49 {19.37%} no a contesta; {47.83%} a menciona nan casa of pareha actual; 74 {29.25%}: un expartner; y 9 {3.56%}: tur dos.
DI CUATER PRESENTACION: VIOLENCIA FISICO
Preguntanan tocante violencia físico
A uza 10 preguntanan pa midi e prevalencia di violencia físico; Lo bo por bisa cu ta of tabata berdad cu: a. El a pasa bo un wanta, b. el a tira algo riba bo pa herida bo, c. el a pusha bo, lastra bo of ranca bo cabey, d. el a dal bo un mokete, e. el a suta bo, f. el a skop bo, g. el a purba di choca bo, h. el a purba di kima bo cu un obheto of cu un cigaria, i. el a menaza bo cu un cuchu, j. el a menaza bo cu un revolver?
Di e total di 661 respondientenan 97 {14.67%} a menciona cu nan a experiencia un of mas forma di e abuso aki. Esey kier men cu un di cada 7 hende muhe a yega di experiencia por lo menos un forma di e abuso aki.
Mencionando e agresor
Di e total di 97 respondiente, 36 {37.11%} a menciona nan casa of pareha; 47 {48.45%} a menciona un expareha; 5 respondiente a menciona: tur dos, loke ta 5.15% y 9 respondiente loke ta 28%, no a contesta.
emocion/sentimentonan tocante violencia fisico
| Sentimento/Emocionan | Nada | Apenas un tiki | Tin biaha si, tin biaha no | Un tiki | Masha hopi | Total |
| n=% | n=% | n=% | n=% | n=% | N | |
| Mi a sinti berguensa | 12=16.00% | 0=0.00% | 11=14.67% | 10=13.33% | 42=56.00% | 75 |
| Mi a sinti impotente | 13=16.05% | 1=1.23% | 8=9.88% | 11=13.58% | 48=59.26% | 81 |
| Mi a sinti miedo | 10=11.63% | 2=2.33% | 8=9.30% | 10=11.63% | 56=65.12% | 86 |
| Mi a kere cu ta normal | 53=75.71% | 2=2.86% | 10=14.29% | 3=4.29% | 2=2.86% | 70 |
| Mi a kerecu mi merece | 57=83.82% | 0=0.00% | 8=11.76% | 2=2.94% | 1=1.47% | 68 |
E Tabel aki ta mustra cu e emocion mas menciona ta ¨mi tabatin miedo¨ {86.05%}, sigui pa ¨mi a sinti berguensa¨ y sigui despues pa ¨mi a sinti impotente¨. E opcionnan ¨mi tabata kere cu e ta normal¨y ¨mi a kere cu mi ta merece¨ a ser rechaza pa respectivamente 75.71% y 83.82%. Pero tog tabatin un di cada 4 respondiente cu ta pensa cu esey ta normal y one di cada 6 cu nan ta merece.
Midimento di e frecuencia di e Violencia Fisico
E frecuencia ta ser midi dor di pidi e respondientenan cuanto biaha esaki a pasa: ¨un biaha so; algun biaha; mas cu un biaha pa aña, pero no tur luna; por lo menos tur luna, pero no tur dia; {casi] tur dia; tabata varia; mi no por corda.
E resultado ta lo siguiente:
Un biaha: 24 resp cu ta 25%; algun biaha: 39 resp cu ta 40.63%: mas cu un biaha pa aña, pero no tur luna: 10 resp cu ta 10.42%; por lo menos un biaha pa luna, pero no tur dia: 5 cu ta 5.21%: {casi} tur dia: 10, loke ta 10.42%; tabata varia: 10 loke ta 10.42%; mi no por corda 1 resp loke ta 1.04%. E frecuencia mas menciona ta: algun biaha.
DI CINCO PRESENTACION: VIOLENCIA SEXUAL
E prevalencia di violencia sexual a ser midi pa medio di e siguiente preguntanan: Lo bo por bisa cu lo ta of tabata verdad cu el, bo casa of pareha of ex pareha: a. a yega di forza bo pa wak porno of actonan sexual; b. a forza bo pa tin relacion sexual mientras cu bo no tabata kier; c. bo tog tabatin sex, mientras cu bo no tabata kier, pa motibo di loke bo casa of pareha por a haci; d. a yega di forza bo di tin sex cu abo no tabata kier pasobra bo ta haya esaki degradante of huliyante; e. a yega di forza bo di tin sex sin uza contraceptivo manera pilder of condom; f. Otro, por favor indica, a ser ofreci pa duna e respondiente e posibilidad di menciona un situacion diferente.
Resultado di e contestanan
Di 661 respondiente 63 loke ta 9.53% a menciona cu nan a yega di experiencia un of mas di e formanan di abuso menciona. Esey kier men cu un di casi 11 di e corespondientenan a yega di experiencia un forma di e IPV abuso aki.
Mencionando e agresor
E respondientenan a contesta di e forma aki: di 63 respondiente, 23 loke ta 36.51% a menciona nan actual casa of pareha; 30 loke ta 40.62% a menciona un expareha; y 3 loke ta 4.76% a menciona: tur dos.
Tabel: SENTIMENTO/EMOCIONNAN TOCANTE ABUSO SEXUAL
| Sentimentonan/emocionnan | Nada | Apenas un tiki | Tin biaha si, tin biaha no | Un tiki so | Masha hopi | Total |
| n=% | n=% | n=% | n=% | n=% | N | |
| Mi a sinti berguensa | 13=24.07% | 3=5.56% | 9=16.67% | 6=11.11% | 23=42.59% | 54 |
| Mi a sinti impotente | 12=21.82% | 1=1.82% | 8=14.55% | 8=14.55% | 26=47.27% | 55 |
| Mi a sinti miedo | 11=20.00% | 1=1.82% | 7=12.73% | 12=21.82% | 24=43.64% | 55 |
| Mi a kere cu ta normal | 30=65.22% | 1=2.17% | 6=13.04% | 3=6.52% | 6=13.04% | 46 |
| Mi a haya cu mi a merece | 33=73.33% | 2=4.44% | 6=13.33% | 4=8.89% | 0=0.00% | 45 |
E Tabel aki ta mustra cu e emocion ¨mi a sinti miedo¨ a ser menciona como sentimento mas negativo {78.18%} sigui pa ¨mi a sinti impotente {76.36%} y despues sigui pa: ¨mi a sinti berguensa loke ta [70.37%]. Un biaha mas e sentimentonan ¨mi tabata kere cu e ta normal¨ y ¨mi ta kere cu mi merece¨ a ser rechaza casi totalmente pa e respondientenan respectivamente pa [65.22%] y [73.33%]. Tog un di cada 3 hende muhe y un di cada 4 ta kere cu esaki ta normal y cu nan merece.
Midiendo e frecuencia di e Violencia Sexual
E frecuencia ta ser midi dor di pidi e respondientenan di menciona cuanto biaha esaki ta pasa: a. un biaha so: 10 resp cu ta 15.38%; un par di biaha: 36 resp cu ta 55.38%; mas cu un biaha pa aña, pero no tur luna: 4 res cu ta 6.15%; por lo menos cada luna, pero no tur dia: 1 resp cu ta 1.54%; {casi} tur dia: 4 resp cu ta 6.15%: ta varia: 8 resp cu ta 12.31%; mi no por corda: 2 resp cu ta 3.08%.
Resumen di e prevalencia di cada sector:
A tuma e decision di considera cada forma di IPV di un manera serio como un forma real di abuso di IPV.
Seccion control: 1 di cada 2 respondiente
Seccion amenaza: 1 di cada 5 respondiente
Seccion Abuso físico leve: 1 di cada 6 respondiente
Seccion Abuso psychologico 1 di cada 3 respondiente
Seccion control financiero 1 di cada 7 respondiente
Seccion Violencia Fisico 1 di cada 7 respondiente
Seccion Violencia Sexual 1 di cada 11 respondiente
En general por ser bisa cu e prevalencia di violencia contra hende muhe den e ultimo 5 aña na Aruba ta casi 1 di cada 6.
Remarca: Solamente e ultimo 2 forma di Violencia Domestico tin un “score” apart y varia riba e tabel pa midi e intensidad di e maltrato. E cinco prome forma di maltrato ta ser midi cu e cifra 1. Esaki ta inhusto pasobra nan tambe ta causa hopi daño. Pa e motibo ey diferente país a dicidi di haci un cambio den nan Codigo Penal pa duna tur e formanan aki di maltrato un peso mas grandi pa haya un miho idea di e daño cu Violencia Domestico ta causa. Mi tambe ta sigui nan ehempel y ta trahando riba un proposicion di cambio pa ser publica den Codigo Penal. Mi ta calcula cu e prevalencia lo mustra cu di 4 hende muhe y no di 6, por lo menos un ta ser maltrata cu Violencia Domestico.
Skirbi pa: mr. Dr. Alida “Lily” Marval
