Heart-Centered Leadership Foundation (HCLF) tin e grato placer di anuncia cu su podcast di hoben pa hoben ta bek y den un formato nobo. Desde 4 di maart por mira un episodio nobo tur diaranson 2:00 pm riba e plataformanan di Youtube y Facebook di HCLF.
Vox ta un podcast unda ta duna hobennan e oportunidad di por comparti experiencia, ideanan y perspectiva unico di kico e ta pa ta un hoben. Asina ki HCLF ta traha riba un di su metanan principal cual ta pa promove e participacion di hoben. Durante temporada aki cu lo tin 11 episodio unda hobennan entre 15 y 30 aña lo combersa riba temanan manera autenticidad, identidad, bienestar emocional y mental, vulnerabilidad, conexion, independencia, y mas.
Esaki lo ta e di 3 temporada di e podcast. A lansa e podcast originalmente na final di 2019 y a produci 2 temporada. A tuma un descanso entre 2022 y 2024 pa re-evalua e direccion cu ta hiba e podcast. Cu sosten di fondo hulandes Fonds 21 a cuminsa aña pasa cu e preparacion pa lansa un temporada nobo, den un bachi nobo. E biaha aki e podcast ta den formato di video y hobennan tin un rol crucial dilanti y patras di camera: hobennan cu ta encabesa e podcast door di guia e combersacionnan como “host” di e podcast, y tin hobennan cu ta tras di camera ta maneha aspectonan tecnico manera camera, direccion, lus y zonido. Pa prepara nan pa e rol aki, un grupo di 10 hoben a haya tayernan incluyendo 2 facilita pa e team dinamico di Stichting Djis pa Hari Multiverse tocante kico ta un podcast y con pa prepara pa filmacion.
Ademas a haci dos ronda di test, unda videografo local hoben, Jeremy Franscico di Phrames and Motion, a sostene e hobennan den fortalece nan habilidad tecnico: con pa set up y posiciona cameranan, microfonnan, y lus. E podcast ta wordo graba den un espacio cu HCLF a converti den un studio: VOX Impact Studio ta posibel danki na apoyo di comision di Teresita Center y sosten di Oranje Fonds y Kans Fonds.
HCLF ta haci un invitacion pa bishita e cuenta di youtube www.youtube.com/@VOXAruba of e pagina di facebook HCLFoundationAruba pa mira e episodionan di e podcast y sostene nos hobennan. Pa mas informacion por tuma contacto cu HCLF na 5841211 of na hclfaruba@gmail.com
