Tur hende mester ta na altura di locual ta para scirbi den Bijbel esey ta nifica cu grandi y chiki y especialmente nos hubentud mester sa esaki:
Mateo 22:37-39 Hesus a contesta bisando: Stima Senjor bo Dios , cu henter bo curason, cu henter bo alma,y cu henter bo mente. Esaki ta e gran mandamento y e di prome. Y e di dos ta semehante. Stima bo prohimo manera bo mes.
Marco 12:28-31 ta confirma esaki, Lucas 10:27 ta confirma esaki, y 1 Juan 4:19-21 ta bolbe recorda nos cuanto nos mester stima Dios y nos ruman.
Pero ora nos tin amistad cu un hende, cu ta pone nos integridad, nos famia, nos matrimonio, y e respet pa nos hogar na peliger, nos por papia cu e persona pa e drecha su conducta , pero si e no kier tende nos no por permanece den amistad cune. Y esey ta conta pa tur hende.
1 Corintionan 15: 33 ta bisa: No laga ningun hende ganja boso, mal compania, ta danja bon custumber.
Hopi biaha nos kier complace cu hende, mientras cu nos nomber ta wordo susha, nos integridad ta na peliger y hasta nos tin chens pa cay den man di polis, djis pasobra nos tin amistad cu cierto hende di mal comportacion.
Laga nos cuminsa cohe e toro na su cacho;
Den Matrimonio, bo no por tin amistad cu hende cu no ta respeta bo matrimonio, di un manera cla bisa e hende aki kier hinca bo den un bida soltero siendo casa, of kier pusha bo den caminda di adulterio.
Esaki ta conta tanto pa hende muher como hende homber.
Un persona cu no tin respet pa asunto familiar, ni tampoco ta respeta deber matrimonial, por ehempel bo mester ta na cas, pa bo ta hunto cu bo famia, y tur dia bo no por yega cas laat, y mas ainda ta hole alcohol. Bo mester cumpli cu bo cas, y bo esposa of esposo , si bo mira cu e persona ey ta bay linja recto contra esey , bo mester kibra e amistad. e no ta cumbini abo y famia.
Como hoben tene esaki na cuenta:
Bo tin un amistad cu no ta respeta su mayornan, cu no ta interesa pa bay scol, of pa busca un trabao, pero e tin tur cos, y su mayornan no ta miyonario, ta tempo pa bo wak bon cu ken bo ta, especialmente si e ta bebe, droga, y tambe cana arma, esaki ta conta pa tanto mucha muher y mucha homber.
Den caso cu bo ta un mucha muher y bo amiga, ta invita bo pa bisti e panja di mas chikito of sunu posibel, pa sali cu hende cu bo no conoce.y nan no kier busca bo na cas. Bo mester topa cu nan cierto caminda, Watch out.
Keda leu for di hende cu constantemente tin mal beis , constantemente ta papia malo di otro hende, constantemente kier discuti, y constantemente ta mumura, y constantemente kier bringa. Aparta for di tipo di hende asina.( Proverbionan 22:24-25).
1 Corintionan 5:11 Pablo ta haci un remarke hopi delicado bisando: Ma awor mi ta scirbi boso,pa no asosia,cu ningun hende cu ta ruman pa nomber,si e ta un inmoral,of golos pa placa, of un adorado di Dios falso,of un blasfemado,of un burache,of un estafador, pa ni come mes hunto cu un hende asina.
Akinan Pablo ta hala nos atencion di hende cu conoce Senjor Cristo Hesus, y cu a entrega nan bida y conoce e amor di Dios .Y ta sigi biba den pica cu mal comportacion.( Hebreonan 10:26-31).
Sinceramente, Pastor Marcel Balootje.
