Documentonan reciente cu a sali na luz, ta revela un situacion alarmante cu a tuma lugar den Lotto entre 2012 cu 2018, den tempo di Gobierno di AVP: Patrick Paskel a cobra 1.605.614 florin di fondo publico durante su relacion cu Lotto pa Deporte (FLPD) y Canadian Bank Note Aruba (CBNA), sin un contrat firma. E suma aki ta consisti di 1.117.705 florin di CBNA y 487.909 florin di FLPD, tur cobra entre 2012 y 2018, den un periodo di por lo menos 6 aña. Tur esaki a pasa cu bendicion di Mike Eman, kende a pone man riba cabes di Patrick Paskel y dune e poder pa penetra den tur skina di gobierno, pa saca placa.
Den un e-mail manda di Paskel na Ronald Van Den Berg, director di Lotto den e tempo ey, e mesun Patrick ta confesa cu nunca a existi un contrato firma:“cu nos NO tin contract firma mes mi ta acerca Bo cu mi peticion… nos nunca a haya e contract bek firma, dus tampoco no tin valides.”
Apesar di esaki, segun e mesun e-mail, Paskel a sigui cobrando USD 10.000 pa luna, tur luna, durante 6 aña. E ta duna di compronde den e e-mail cu nan trahando riba base di un “maneho stilzwijgend”, un acuerdo misterioso sin documentacion formal.
Suplica emocional pa sigui cobra placa publico
Ora e gobierno a cambia na 2018 y Lotto a pone fin na e relacion, Paskel a reacciona cu desesperacion, suplicando pa sigui page. Su e-mail ta revela: “Mi kier reitera cu no ta nos intencion pa cana ningun caminda legal cu CBN… Awo ta ora si cera cabes y mira padilanti.” Un frasa cu ta pinta un portret cla: e no tabata pensa riba e meta di FLPD, ni e hubentud deportista cu mester mas apoyo, sino riba su mes ganashi. Su apelacion no tabata pa deporte, sino pa su portamonee.
Malversacion y evasion?
E caso ta trese recuerdo di otro escandalonan: E caso di RDA, unda tambe hopi a cobra, hopi placa malgasta sin aprobacion. E modus operandi ta parce: cobra suma grandi sin base legal y sin transparencia, sin contract. Aki pueblo por mira con placa di deportistanan tabata yega den cartera di Paskel. Anto despues e mes Paske ta grita na radio cu deportistanan ta para bandi caminda pa colecta placa y cu e deportistanan no ta haya placa. E gran pregunta ta: Ki trabao el’a haci? Un fuente na altura a bisa: NADA! Tur e placa aki a wordo declara na belasting? Of Patrick ta den mes un boto cu De Meza? FIOT ya a check e cos aki caba?
Su meta no tabata deporte, sino su saco!
Un persona sin contrato, sin base legal, cu a cobra mas cu 1.6 miyon florin di fondo publico, y ora a perde su fuente di ingreso, a laga sa claramente cu su prioridad no tabata deporte, sino su saco.
Aki conteido di e e-mail:
From: Patrick Paskel Patrick@teragroupnv.com
Date: Wednesday, December 27, 2017 at 5:45 PM
To: Ronald Van Den Berg ronald@arubalottery.com
Cc: Beverly Simmons beverly@arubalottery.com, Patrick Fortin patrick@arubalottery.com
Subject: Re: Contract Agreement 2018
Amigo Ronald,
Ta pasobra cu nos NO tin contract firma mes mi ta acerca Bo cu mi peticion, cu mi ta considera masha humilde y sincero. Na aña 2012 nos a cúminsa un relacion, pero manera por ripara, nunca a yega na un firmamento. Na aña 2015 a pidi pa firma un contract pero di parti Lotto no tabata di acuerdo cu un of mas punto y manera por ripara, nos nunca a haya e contract bek firma, dus tampoco no tin valides.
Bisando bo esey, nos a traha di buena fe pa 5 aña di cual sin contract firma y bou un maneho di “stilzwijgend”. Si acaso a firma esun di 2015 mes, e lo tabata pa un aña y despues tambe a bira pa tempo indefini.
Ta pesey mi kier corigi e pensamiento di Ronald, cu nos lo tin un contract hunto, pasobra esey no ta e caso nunca.
Mi kier reitera cu no ta nos intencion pa cana ningun caminda legal cu CBN, pasobra nos lo kier sigui traha cu Boso pa hopi aña mas, specialmente awo si considera e desaroyonan politico no mucho favorabel pa CBN. Awo ta ora si cera cabes y mira padilanti.
Cu e hechonan aki riba mesa, mi ta acerca Bo respuostamente insistiendo riba nos humilde peticion.
Saludos,
Patrick Paskel
Tera Group NV
