Agradecido nos ta na Señor pa tur cos y den tur cos, pasobra Señor ta nos Dios, y Señor ta nos rey, no tin nada , ni tampoco ningun hende cu por reemplasa e presencia di Dios den nos bida.
Placa no por, material no por, posicion den trabao of comunidad no por,rango militar, herencia grandi no por, nada no por iguala na Dios, pasobra den tur cos Dios ta keda Dios di awe y semper.
Gradicimento ta bini di un curason humilde, ora nos corda for di unda Dios a saca nos.
Nos no por huzga ningun hende tocante di nan bida, sin wak nos propio bida prome.
Nos no por halsa nos mes, sin tene cuenta cuanto nos debe na Dios, pasobra locual Dios a haci pa nos den nos bida , ningun hende no sa, esey ta un secreto entre Dios cu nos.
Pasobra Dios a haci asina tanto cos pa nos, cu nos mes como hende no por imagina cuanto cos Dios a haci pa nos.
Djis corda ora malesa /necesidad a bati na porta ken a yuda nos, sino ta Dios.
E palabra di Dios ta bisa den Isaias 40:31:Ma esnan cu spera riba Señor lo haña forsa renoba, nan lo bula bay ariba cu hala manera aguila,nan lo core sin bira fatiga,nan lo cana sin cansa.
E palabra spera riba Señor ta nifica hopi pa nos bida, ora nos mester tuma cierto decision, pasobra nos tin cu haña un confirmacion di dj’E, ora nos ta afilia na cierto grupo of amistad, ora nos ta bay contrae matrimonio, den un palabra bisa den tur cos nos tin di pone Dios prome, y percura pa haci e boluntad di Dios, pa asina nos tin e proteccion di Dios.
No laga emocion, orguyo, fanatismo y capricho domina, pasobra ningun di eseynan no ta duna nos un base solido pa haci algo den nos bida, solamente e Palabra di Dios ta duna garantia.
No ta boluntad di Dios den ningun caso pa lus uni cu scuridad, e palabra ta bisa nos pa no uni den yugo desigual ( 2 Corintionan 6:14-18) den ningun caso, pero aparta nos mes for di tur cos caminda nos ta bon na altura cu tin scuridad.
Sosega den Señor y warda cu pasenshi riba dj’E,no consumi pa motibo di esun cu ta prospera den su caminda,pa motibo di e hende cu ta ehecuta plan di maldad.
Stop di rabia, y laga furia para, no cunsumi , esey ta conduci na maldad so. Pasobra hacidornan di maldad lo wordo kita afo, ma esnan cu ta spera riba Señor lo hereda e tera.( Salmo 37:7-8-9).
Pasobra for di temponan aya, nan no a tende, ni nan horea no a persibi,ni wowo no a mira un Dios fuera di Bo, kende ta obra pa esun cu ta spera riba dje.( Isaias 64:4).
Dios su tempo ta perfecto, Dios nunca ta yega laat, semper e tey pa nos, ora hende ta hari, djis keda keto y wak e man di Dios move den bo bida, pasobra locual Dios kier haci ningun hende por stroba Dios.
E milager cu Dios tin pa abo den bo bida, ta pa bo mes e ta , bo por pasa den prueba grandi manera Job , of pasa den berguensa manera e muher adultera, ma si bo spera riba Señor , E mes lo lanta bo.
Den Job capitulo 42: 2 Job ta bisa Señor : Mi sa cu bo por haci tur cos, y cu ningun di bo propositonan no por wordo stroba.
Sinceramente, Pastor Marcel Balootje
