Riba diahuebs 24 di september, Wardacosta di Caribe Hulandes a ricibi un yamada for di un persona cu a tuma nota di movecion nan straño riba lama. Tawata trata di un boto den vecindario di Rodgers Beach ku tawata drif riba awa. Inmediatamente a pidi pa personal di Wardacosta na Savaneta pa sali den direccion di e boto. Miembro nan di Centro Maritimo Operacional na Corsou tambe a pidi asistencia di un di nos unidad nan di helicopter pa duna sosten for di aire.
Na momento cu a yega cerca di e boto, a tuma nota di tres persona indocumenta abordo. E siguiente paso tawata pa conduci un investigacion riba e boto. E proceso aki a tuma luga na Steunpunt di Wardacosta na Savaneta. Despues di investigacion preliminar aki a resulta cu e personan nan ta di nacionalidad Dominicano.
Hunto cu asistencia di Unit Mensenhandel en Mensensmokkel (UMM) y tambe K-9 Unit di KPA a haci un control riguroso riba e boto y a bin na conclusion cu no tawata tin nada particular riba e boto mes. E tres personanan a ser entrega na Guarda Nos Costa cu hunto cu UMM lo continua cu e paso nan necesario pa atende cu e tres personanan.
