Djawebs último e Sentro di Operashonnan Marítimo (MOC) di Wardakosta a risibí un yamada pa asistensia di un boto di piskadó ku tabatin problema ku su motor. Na e momento ei, e boto ku yama Charnelle tabata na altura di Wèstpunt ku dos hòmber lokal na bordo.
Abase di e notifikashon akí MOC a dirigí e helikòpter di Wardakosta pa e lokalidat di e boto pa por evaluá e situashon. E boto Charnelle no tabatin marifoon (radio VHF) na bordo. Pa e motibu ei e dos hòmbernan tabata por a komuniká solamente ku un telefòn selular na bordo pa mantené kontakto. E dos hòmbernan a indiká ku nan a pidi amigunan pa bin asistí nan ku un otro boto di piskadó. E boto ku a bin pa yuda Charnelle ku yama Arca, na yegada na e sitio tambe a hañ’é ku problema i no por a asistí Charnelle mas. Konsekuentemente MOC a bolbe dirigi e helikòpter di Wardakosta pa e sitio pa por hisa e dos hòmbernan for di e boto Charnelle. Tambe MOC a yama i dirigí CITRO, un Metal Shark i e avion di Wardakosta pa por duna asistensia na e boto di piskadó Arca.
Na yegada di e helikòpter a hisa e dos hòmbernan di Charnelle na bordo di e helikòpter. Ademas a entrega awa i kuminda na e dos hòmbernan na bordo di Arca. Despues di un ratu e dos hòmbernan na bordo di Arca a logra start e motor di nobo, i komo tal nan mes a logra nabega direkshon di Playa Piskado. CITRO a bai duna asistensia na Charnelle, i a hiba esaki na Playa Piskado.
Wardakosta ta enfatisá e importansia di bon ekipo di komunikashon na bordo di un boto. Personanan ku ta nabegá no bai solamente ku un telefòn selular komo medio di komunikashon pasobra esaki no ta sufisiente. Den kaso ku e telefòn selular faya òf no tin señal òf e bateria a kaba, e kontakto ku e okupantenan riba boto por bai pèrdí. Un radio marino (radio VHF) na bordo ta mas konfiabel pa mantene kontakto ku Wardakosta of otro botonan riba laman na momento di problema.
Wardakosta ta konsehá tur doño di boto pa mantené nan boto regularmente. Sòru pa bo tin sufisiente ekipo di seguridat i reskate na bordo manera: salbabida, flashlight, kit di promé asistensia, sufisiente awa, aparato di paga kandela, radio VHF i un telefon selular kargá. Evita ku bo boto ta daña na kaminda i kubo tin un situashon peligroso riba laman ku bo boto i bo pasaheronan. Den kaso ku bo mester di yudansa, bo por tuma kontakto ku Wardakosta riba kanal VHF 16, yama e number di emergensia 913, òf manda un mensahe via Whatsapp na 005999 510 0913. Wardakosta ta deseá bo un biahe plasentero i sigur.
