Minister Glenbert Croes a anuncia:
Diamars atardi Minister Glenbert Croes a anuncia cu WEB a yega na un deal cu e compania EAGLE LNG. Eagle LNG lo bay suministra gas na WEB pa un temporada largo. Eagle Lng lo usa su mes un placa y pesey mes un contract di largo duracion ta importante.
Haci cambio pa gas ta loke cu pa hopi aña caba nos ta papia riba dje. Gobierno di Mike Eman a papia di dje, pero no a logra. A bini Gas Unie, pero no a logra. Tambe tabatin projecto di Ecogas pa suministra gas na WEB, pero tampoco a logra.
WEB awor tin un contract di suministro y nos ta bay laga awor fuel oil atras y nos ta bay den un transicion di gas, pa despues sigui pa hydrogen.
Minister Glenbert Croes a bisa cu e terminal di Eagle lo bini na Sanicolas riba tereno di RDA y segun SOLO DI PUEBLO a compronde, cu e espacio na Sanicolas ta mucho mihor cu e espacio na Barcadera/Balashi.
Tambe lo mester bini un pipa di gas cu lo core di RDA pa WEB. E pipa aki a wordo deseña pa Gas Unie y por bisa cu ta e mes un modelo aki Eagle LNG lo usa, pues e intencion tey tambe pa core e pipa aki bao tera.
Gas ta mas stabiel, mas limpi y tambe ta costa menos pa produci coriente. Pues dia cu e suministro di gas cuminza, nos lo los di e dependencia di fuel oil y su prijs cu ta fluctua constantemente.
SOLO DI PUEBLO ta felicita Minister Glenbert Croes pa e logra grandi aki como tambe Gobierno di Aruba, pasobra despues cu hopi a papia, MEP ta mustra di ta trahando duro pa realisa cosnan grandi pa Aruba.
