ORANJESTAD – Dia 21 di januari ultimo, a tuma lugar un webinar exitoso na comerciantenan di region di Caribe riba e tema di haci negoshi cu Aruba. Departamento di Asuntonan Economico, Comercio y Industria (DEZHI) a duna presentacion conhunto cu Camara di Comercio di Aruba y Freezone Aruba NV riba oportunidadnan pa negoshi y inversion na Aruba. E webinar aki a keda organisa hunto cu Caribbean Export Development Agency.
Participacion record
Caribbean Export Development Agency ta un organisacion prominente den region di Caribe cu un red amplio di comerciantenan cu kier haci comercio den region. Esaki a keda demonstra tambe a base di e interes y participacion na e webinar aki. Por medio di e red di Caribbean Export Development Agency, e webinar cu e titulo di ‘Aruba: Untapped Opportunities Next-Door’ a logra un participacion record di 115 participante interesa pa exporta pa Aruba, busca partnership y inverti na Aruba.
Aruba Trade Board (ATB)
Durante di e webinar aki, e plataforma nacional di comercio y inversion bou di e nomber di Aruba Trade Board (ATB) a presenta Aruba na un manera digno y profesional. ATB lidera pa DEZHI ta consisti di miembronan di sector publico y priva cu experticio y conocimento riba comercio internacional y inversion, manera Departamento di Asuntonan Exterior (DBB), Camara di Comercio di Aruba (KVK), Aruba Trade and Industry Association (ATIA) y Freezone Aruba NV (FZA).
Hopi interes pa cooperacion
Ademas, Sra. Rena Rahaman, Market Development Manager di Carib Brewery Ltd., a presenta un testimonio di un compania den region di Caribe cu a confirma e profesionalismo di e comunidad comercial na Aruba. Tur esaki a conduci na un cantidad di pregunta y proposicionnan di negoshi cu ATB lo atende, pa asina aporta na e desaroyo economico di Aruba, awor mas cu nunca un prioridad den e aña di recuperacion.
Mas informacion?
Tuma contacto cu DEZHI na info@deaci.aw of sigui nos riba Facebook @DEACI.
