Un challenge grandi lo tuma lugar diasabra awor 19 di maart cuminsando pa 8’or di anochi n’e unico y mundialmente famoso Domino Square Garden ay na Calabas. E gran ekipo di Balashi Knights a dicidi cu ta basta para na banda wak otro team pretende di sa hunga domino, y cu ta tempo awor pa ‘the real McCoy’ bin demostra kico ta domino di nivel mundial! Pa inicia nan temporada di 2022, Balashi Knights a challenge nada menos cu doño di cas mes, esta e flamante TEAM 99 bou guia dje embahador di China, e guy cu ta gara 3 conofes pareu c’un solo hanzue!
Wel shonnan, e trabuconan di TEAM 99 no a perde pa gana y a acepta e desafio aki di biaha! Un ta prome biaha cu e dos ekiponan aki ta midi forsa y tur biaha ta motibo pa tension halto y nivel di adrenalina manda te chup! Ken lo laga ken pega bou dje famoso mata di kwihi aya na Highway 69 na Calabas? Bin, goza y wak pa bo mes diasabra awor, 19 di maart, cuminsando pa 8’or di anochi n’e unico Domino Square Garden na mundo. Manera ta custumber, entrada ta completamente gratis, y snacks lo core na ordo completamente por nada durante half time. Shonnan amante di bon domino, ata aki otro sambombaso n’e unico y exclusivo Domino Square Garden na mundo! Yegaaa!
