Ta mescos e cas bandona na Sabaneta cu Mike a bay chapi!
Un desaroyo recien ta pone den duda e nivel di coneccion cu realidad di Wendrick Cecilia. El’a bay cana riba e tereno di UNDESA, un team deportivo cu ta inactivo ya pa hopi aña. Ultimo biaha cu nan a trata di lanta UNDESA tabata pa 2015-2016, pero esfuersonan no a logra, y salud di John Herewood, cu tabata na cabes di e lucha, a bay atras.
Ta cla cu Wendrick no a realisa cu UNDESA no tin team.
E canamento aki riba e tereno inactivo, ta pone nos corda e hecho similar na 2017, ora el’a presenta hunto cu Mike na un cas abandona na Savanta y a cuminza chapi rond di e cas. Ta purba hasi show pa crea sensacion!
E accionnan ta mustra un falta di orientacion y desconeccion total cu realidad.
Mientrastanto, e ta purba desacredita esfuersonan grandi pa deporte na Aruba haci pa Gabinete Wever Croes 1 y 2, rechazando e gran cantidad di proyecto pa deporte cu a bira realidad, manera pista nobo na Palo Marga, lus na veld di Brazil, lus na Madushi Stars, veld di BMX na Sanicolas, basketball court na Village, entre otro.
Wendrick ta keda insisti cu deporte falta inversion y vision den Aruba, y esaki ta un desaroyo cu e ta atribui na e desinteres di e gobernante actual pa deporte.
E realidad ta cu ta su partido a bandona deporte. Stadion GP Trinidad na Dakota a keda un ruina. Futbol mester a huur stadion na Tampa pa 500 mil florin, pa organisa e weganan di Aruba. Tur veld rond Aruba a bay atras. 0,0 mantencion! Tur placa a bay Canada y djey e voceronan radial tabata cobra $ 10.000 pa luna. Nunca Wendrick a durf bisa algo di e deterioro ocaciona pa su partido berde y e ripp off di $ 10.000 pa luna.
Pues, den deporte, Hechos ta papia cla. Palonan di mata cu ta pari bon fruta, semper ta wordo lansa cu piedra.
