Michael Ryan, director ehecutivo di e Programa di Emergencianan Sanitario di e Organisacion Mundial di Salud, a señala dialuna durante un sesion informativo cu COVID-19 por bira den un enfermedad endemico, miho bisa, un padecimento cu pa largo tempo ta afecta constantemente poblacionnan humano.
“Semper ta existi e riesgo di kico of di cual enfermedad ta bira endemico,” Ryan a apunta, pa splica cu actualmente tin un serie di factor cu ta dificulta e eradicacion di COVID-19, entre esunnan cu el a destaca su presencia “den cai tur pais na mundo,” como tambe e imposibilidad di “implementa medidanan integral a largo plazo pa contene y controla e enfermedad.”
Tambe, el a adverti cu e disponibilidad di e vacuna contra SARS-CoV-2 den un futuro cercano “no lo ta suficiente pa para e transmisio (di e virus),” pa cual ta calcula cu e lo sigui extende.
Di e mesun manera, el a recorda cu den historia di humanidad solamente a logra eradica un enfermedad, bruela, motibo pa cual “e disponibilidad di e vacuna y e boluntad di eradica” coronavirus “no ta garantisa exito.”
Sin embargo, el a sigura cu danki na e efectividad di e vacunanan desaroya te asina leu, ta posibel reduci e tasa di mortalidad, como tambe e impacto cu e enfermedad por causa den sociedad, specialmente entre e gruponan mas vulnerabel.
Di acuerdo cu e datonan ofreci pa e Universidad Johns Hopkins, desde inicio di e pandemia a registra na nivel mundial mas di 99,6 miyon di contagio door di SARS-CoV-2, como tambe un cantidad di fayecimento superior na 2,1 miyon pa tal causa.
