Na 1981, Karina Daryanani a bira miembro di Women’s Club of Aruba (WCA) como un di e miembronan di mas jong di club e tempo ey. Karina procedente di India, kende a caba di drenta enlace matrimonial, tabata desea di topa cu e damanan di nos isla y tabata desea di duna su tempo como boluntario na su comunidad nobo, cu ta Aruba. Semper e tabata para cla pa yuda na nos eventonan cu decoracionnan di su tienda Palais Hindu y tambe cu algun articulo pa diferente rifa.
Pa hopi aña, Karina a duna hopi di su tempo na comunidad planeando y organisando proyectonan pa e Comision di Ways & Means, cu ta e comision cu ta encarga pa recauda fondo pa WCA, cual fondo ta bay bek den comunidad.
Tambe Karina tabata tene su mes ocupa na organisa tayernan pa nos Christmas Bazaar, cu ta tuma luga tur aña den luna di december.
Karina ta un miembro cu semper ta cla pa yuda unda cu e por, ora cu e por y con cu e por. Como esun encarga cu miembrecia, vice-presidente di WCA, Ursly Silberie, hunto cu Bernadette Schouten y Angele Geerman di e Comision di Miembrecia, a haci entrega di e certificado di reconocimento y un bunita bouquet di flor na Karina den nomber di tur miembro presente na e ultimo reunion general di miembrecia na
PF Changs na edificio di Imax Movie.
Directiva y miembronan di WCA kier a haci uzo di e oportunidad aki pa felicita Karina cu su reconocimento bon mereci y ta desea pa e ta miembro di club pa hopi aña mas. Pabien Karina!
