E noticia tabata duro, doloroso y basta tristo pa miembronan di Women’s Club of Aruba (WCA). E noticia cu miembro Pearle (Pearl) Cromarty, a bay laga nos, a bin di un forma inespera. Nos a comparti tristeza cu otro y lagrima a yena nos wowo .
![](https://solodipueblo.com/wp-content/uploads/2024/07/foto-02.jpg)
Nos lo haya su falta hopi na reunionnan general di miembrecia, pasobra tur luna e tabata loyal cu su presencia. E tabata stima entre nos miembronan!
Pearle Cromarty a nace na october 1932 y a bira miembro di WCA na aña1985 y ora el a cumpli 80 aña, y tabata un miembro activo pa 30 aña, a instal’e como Life Member segun nos Constitucion y Statuto. Su boluntarismo semper tabata continuo y cu e cariño pa nos grandinan, el a haya su mes ta bishita e casnan di nos grandinan pa hunga bingo cu nan of pa ta presente pa yuda caminda tabata rekeri su presencia.
![](https://solodipueblo.com/wp-content/uploads/2024/07/foto-01-1.jpg)
Pearl a cumpli cu bendemento di ticket p’e proyecto pa recauda fondo pa club y remarcabel tabata, cu compara cu e otro miembronan, e tabata esun cu tabata bende mas hopi ticket.
Durante e añanan cu e tabata traha, e no por a atende e reunion general di miembrecia tur ora, pero ora el a alcansa edad di pensioen, e tabata presente tur luna. Ta den e temporada ey, el a bira miembro di directiva como chairman di Ways & Means pa 1995-1996.
![](https://solodipueblo.com/wp-content/uploads/2024/07/pearl-1024x683.jpg)
Durante e aña ey tambe, el a join e grupo cu a bay atende e Convencion di General Federation of Women’s Clubs (GFWC) na Nashville, Tennessee. El a pasa un tempo agradabel, a gosa di e convencion y nan a gosa di su compania. E tabata un dama hopi amabel! Bon educa y humilde!
Pearl tabata forma parti di e koor di Misa Protestant y pa e motibo aki a pidie pa para semper padilanti pa canta nos Ode na cada reunion general, locual e tabata encanta haci.
Sigur Pearl tabata hopi agradecido na su amiga- y compañeranan di club cu a cuid’e, busc’e pa bay reunion, bishitando e riba su hacimento di aña y tambe pa tira bista con tabata bayendo cu su salud: Adelaida, Diana, Myrna, Ursly, Mary Droogh, Rita, Greta y Lilla.
Na 2017 Pearl a bira e prome Reina di Carnaval di WCA, durante aña di presidente Marva Solagnier. Feliz y contento Pearl tabata y na final di su reinado, el a menciona cu su aña a pasa mucho lihe y cu ya e mester pasa e corona pa un otro persona.
Awo, na edad di 91, Pearl a bay di biahe pa no regresa, lagando nos atras c’un duele profundo!
Tempo ta pasa, nos ta agradecido cu e tabata nos miembro, di tin e den Historia di WCA y cu su memorianan bunita lo duna nos algun consuelo.
Condolencia na tur famia, amigo- y miembronan di WCA, cu Pearl stima sosega na paz!