Den e multilingualismo cu ta presente den tur scol aki na Aruba, e idioma Hulandes ta tuma un posicion special. Pa docentenan esaki no ta un tarea facil: Hulandes ta e idioma di instruccion, pero awo mester wordo ofreci como idioma stranhero uzando material didactico di Hulanda – con por haci esaki?
Riba encargo di Nederlandse Taalunie dr. Veronika Wenzel lo ofrece workshopnan na docentenan di enseñansa secundario na Aruba, cu ta duna e materia Hulandes y na docente cu ta duna otro materia cu no ta idioma.
Den e proyecto aki dr. Wenzel ta traha hunto cu Departamento di Enseñansa Aruba (DEA) y Instituto Pedagogico Arubano (IPA). Durante e workshopnan e docentenan lo traha orienta riba practica y tambe lo reflexiona riba nan propio accion. Nan lo cera conoci cu diferente forma di traha pa asina haci e alumnonan mas activo y hisa e placer di siña. Un acercamento creativo na e metodo ta yuda den e cambio pa un acercamento di idioma stranhero.
Docentenan di materianan cu no ta idioma ta experiencia con nan por sostene e comprondemento di texto cerca e alumno, haciendo uzo di e alumno su capacidad di idioma na un manera ludico.
E workshopnan ta forma parti di un investigacion cientifico di necesidad cu dr. Veronika Wenzel a conduci conhuntamente cu DEA y Universidad di Aruba. Dr. Wenzel mes ta docente di Hulandes como idioma stranhero, ta duna les na Alemania y tin experiencia den instrui y recapacita docente.
E workshopnan pa docente di Hulandes ta: “Forma di traha activado” (9 y 25 di november) y “Traha cu e metodo” (16 y 18 di november).
E workshop pa docentenan di otro materia ta: “Idioma di instruccion” (11 y 23 di november).
Por registra hunto cu un aviso pa Director di Scol directamente cerca dr. Wenzel na: wenzelv@uni-muenster.de mencionando nomber, scol, fecha desea y e materia di cual bo persona ta duna les. Participacion ta gratis.
