Durante di e Conferencia Ministerial di e 21 edicion di Overseas Countries and Territories – European Union Forum, Presidente di Conseho Teritorial di Saint-Barthélemy, Xavier Lédée, a enfatisa e importancia di cooperacion entre teritorionan ultramar pa enfrenta reto comun.
Durante su participacion na Aruba, Lédée a destaca cu temanan manera transicion di energia, cambio climatico y proteccion di medio ambiente ta central pa e agenda di islanan manera Saint-Barthélemy.
“Nos ta enfrenta reto similar manera horcan, subida di nivel di lama y presion riba medio ambiente,” segun Lédée.
El a subraya cu fortalecemento di partnership cu Union Europeo y otro miembro di OCT ta esencial pa logra progreso sostenible. “Hunto nos ta mas fuerte. Nos tin interes comun y nos mester traha hunto pa proteha nos medio ambiente,” el a declara.
Lédée a pone enfasis riba e importancia di intercambio di conocemento entre islanan, señalando cu cada teritorio tin su propio experiencia cu por beneficia otronan. “Nos mester comunica y comparti mas informacion riba solucionnan practico cu ta funciona den cada isla,” el a indica.
Segun e lider di Saint-Barthélemy, tema manera maneho di desperdicio, produccion di awa y planificacion urbano ta reto concreto cu islanan chikito mester atende cu solucion innovador y sostenibel.
Un punto importante menciona durante su declaracion tabata e progreso reciente dentro di OCTA, caminda, segun Lédée, e organisacion a logra fortalece su base financiero.
“Awor nos ta den un posicion mas fuerte pa move dilanti y sirbi nos teritorio mas eficiente,” el a señala, reconociendo e rol di Aruba den e liderazgo di e asociacion.
El a conclui cu, apesar di distancia geografico, e islanan ta profundamente conecta. “E lama no ta separa nos, pero ta uni nos. Nos tin un historia comun y interes comparti,” segun Lédée.
E participacion di Saint-Barthélemy den e foro ta resalta e importancia di colaboracion regional y internacional pa logra solucion sostenibel y fortalece resiliencia di teritorionan ultramar.
Tocante OCTA/OCT-EU Forum
The 21st Overseas Countries and Territories – European Union Forum
Na april 2026 Aruba lo ta anfitrion di e di 21 edicion di Overseas Countries and Territories – European Union Forum, un plataforma internacional pa dialogo entre Union Europeo y su Paisnan y Teritorionan Ultramar (LGO).
E foro ta reuni formuladornan di maneho, diplomaticonan y representantenan di sector publico y priva pa discuti temanan strategico manera cooperacion sostenibel, cambio climatico y transformacion digital.
Como Pais y Teritorio Ultramar, Aruba tin un rol unico como brug entre Europa y region Caribe. E foro ta brinda un oportunidad pa fortalece cooperacion y intercambio entre partnernan internacional.
