“E ambicion cu tin ta pa Aruba no solamente para bek riba su pia pero pa avansa cu capacidadnan di innovacion acelera”
ORANJESTAD -Diasabra 14 di augustus tabata un gran dia na Xavier University pa varios motibo. A cuminsa cu e graduacion di studiantenan entusiasma pa cuminsa nan profesion den medicina. Despues di e ceremonia di graduacion tabatin dos otro celebracion.
E prome celebracion tabata cortamento di cinta di e dormitorionan di Xavier University. E edificio di dormitorionan nobo ta situa na e universidad mes na Hato. E dorm caminda studiantenan ta keda ta dedica na famia Poola cu a haci un donacion generoso pa completa e edificio. Prome Minister ta felicita y ta desea Xavier University exito cu e prome Fase di e proyecto bunita aki cu ta completa awor.
E segundo celebracion cu a tuma luga tawata e groundbreaking di e di dos fase di construccion di e compleho situa na Hato, e edificio pa e Universidad cu ta un state-of-the-art. Prome Minister a haya e oportunidad pa bishita e sitio di construccion y a keda hopi impresiona cu esaki.
Prome Minister Evelyn Wever – Croes na e ocasion a haci uzo di e oportunidad pa gradici
Xavier University School of Medicine pa e confiansa cu nan a deposita den nos isla y e compromiso pa engrandece locual ta ofrece na educacion y e experiencia na Aruba. Ta spera cu e ceremonianan di graduacion continua pa hopi aña cu ta bin nos dilanti. Pasobra e rol di Xavier Univeristy den nos comunidad como un instituto di inteligencia, ta esencial den proceso pa sostene recuperacion economico y den crea un futuro resiliente pa nos nacion.
Den su discurso Prome Minister a expresa: “E impacto di e medidanan contra COVID-19 a accentua con fragil Aruba su economia ta y inmediatamente a pone nos reflexiona riba e necesidad pa ta mas resiliente y adopta un maneho di recuperacion integral. Conhuntamente cu centenares di stakeholders cu a inverti nan tempo, a desaroya un Master Plan pa mobilisa e nacion y logra Aruba cu aspiracion, un transicion exitoso pa un modelo economico nobo cu ta sostenibel, inclusivo y resiliente. E decisionnan cu nos ta tuma awe y esunnan cu ta tuma den futuro ta forma e caminda pa Aruba bira un isla mas resiliente y un sociedad cu ta medioambientalmente mas responsabel. Esaki ta necesario pa tur residente y futuro generacionnan.
E ambicion cu tin ta pa Aruba no solamente para bek riba su pia pero pa avansa cu capacidadnan di innovacion acelera. Y pa logra esaki, nos ta agradeci na tur partners manera entre otro Xavier University, School of Medicine”.
