Ultimamente por a nota cu Parlamentario Marisol Tromp ta comenta riba e tereno di finansas. Ta obvio cu e no ta domina e materia y tambe ta obvio cu e no ta lesa tur documento, pero si e ta purba di desacredita constantemente e maneho di Minister di Finansa Xiomara Maduro.
Parlamentario Marisol Tromp, cu tanto palabra a bisa durante reunion di Parlamento cu Xiomara Maduro no ta sirbi como Minister di Finansa y esaki ta inaceptabel. “Contrario, mi persona ta considera Xiomara Maduro e miho Minister di Finansa cu Aruba a mira den hopi tempo”, Lider di MEP Evelyn Wever-Croes a enfatisa.
Prome cu Xiomara Maduro Aruba a mira un gabinete di AVP cu a conoce no 1 pero 3 Minister di Finansa; Mike de Meza cu no tawata conoce e diferencia entre e asset y income. Despues a bin Richard Arends cu en bes di traha pa finansas di Aruba a traha riba su propio finansas di bira director di RDA y durante cu e tawata minister el a haya salario di director, el a firma pa RDA paga su gastonan mientras e ta minister. Despues a bin Angel Bermudes, un veterano den impuesto cu amplio conocimento, pero cu miedo di Mike Eman ken a pone un klem na su boca y tampoco e tawatin e curashi pa tuma decisionnan pa finansa publico di nos pais.
“Awor pa casi 7 aña caba nos tin un Minister di Finansa cu ta Xiomara Maduro cu tin e curashi, e determinacion y e conocemento amplio riba e materia pa tuma decisionnan balansa.
Y e echo cu awor nos por paga e indexering na e empleadonan publico, na empleadonan di fundacionnan, na esnan cu ta traha den enseñansa, nos a hisa e reparatietoeslag pa pensionadonan y pa empleadonan di sector priva cu ta gana menos di Awg. 2500 y tambe a hisa onderstand pa gehandicapten ta danki na e determinacion y vision di Xiomara Maduro como Minister di Finansa. Un persona fuerte, firme, duro pero cu un curason grandi pa loke ta e ciudadanonan di pais Aruba”, Lider di MEP a remarca.
Marisol Tromp ultimamente a subi e cabay pa ataca y atacha Xiomara Maduro su logronan. E no ta exitoso den esaki pasobra institutonan internacional mes ta confirma cu Aruba ta prosperando. Financieramente Aruba ta aplicando un maneho financiero hopi responsabel y prudente y esaki ta danki na e maneho di Minister di Finansa, Xiomara Maduro.
“Pues cu esaki nos kier pone un biaha mas bon cla cu mi persona y e henter partido Movimento Electoral di Pueblo ta sostene Xiomara Maduro y nos ta considera Xiomara e miho Minister di Finansa cu Aruba a conoce den hopi tempo y cu e atakenan infunda door di Marisol contra Xiomara ta puro envidia di un persona cu ta purba haya popularidad a costo di otronan. Ta bon pa pueblo di Aruba realisa cu e intento di manipulacion di Marisol ta pa e pueblo cay den e trampa di su envidia y negativismo”, Lider di MEP a termina bisando.