Tin hopi mucha, tin hopi hoben cu no sa cuanto dolor nan comportacion ta haci na nan mayornan, pasobra nan no kier tende.
Bo sa kico ta nifica un hoben tin un brommer, y su mayor a bise pa no corre brommer y tur dia ora e sali cas, emayor ta ansha te ora e bin cas bek.
Bo sa kico ta un hoben ta cana cu mal amigo, of den gang y su mayornan ta preocupa pasobra un momento of otro mal noticia por drenta di dje, of un noticia cu e a haci danjo na otro, of cu e a wordo detene.
Bo sa con grandi e dolor ta ora mayor lanta un yiu den bon caminda, pero awor cu e bira grandi e a desvia completamente, for di locual e a ricibi di su mayornan.
Bo sa kico ta tristo ora un yiu na cana cu arma, y noticia a yega cas cu e mata, of nan a mate, e dolor ta keda pa e mayornan.
Bo sa kico ta tristo ora abo como mayor no ta bebe y bo yiu ta bebe bin cas burachi y bin busca problema y destrui cos den cas.
Ta un cos hopi doloroso ora un yiu muher bao di influencia di droga y alcohol, ta para dilanti di cas ta insulta su mama cu palabra sushi, pasobra su mama a hala su atencion, tocante su comportacion.
No lubida cuanto rey David a yora ora Absalon su yiu a wordo mata, aunke Absalon kier a mata su propio tata, pero su tata David tabata stime hopi.
Laga tur hoben tene cuenta cu aunke con malo nan comportacion por ta, nan mayornan no por stop di stima nan, y nan hechonan di bobedad semper lo haci dolor na nan mayornan.
Den 2 Samuel 18:33 David a yora Absalon, pero tur hende sa kico Absalon a haci cu su tata, pero David no por a sconde su lagrimanan, y su dolor.
Proverbionan 17:25 ta para scirbi: Un yiu bobo ta tristesa pa su tata,y amargura pa esun cu a pone na mundo.
Un yiu no ta bobo pasobra e no a bay scol, pero e ta bobo den e decisionnan cu e ta tuma, den escohe amistad, den uso di droga y alcohol, den e forma di bisti cu e mes ta scohe, y den e forma di bida cu e kier biba, y cu no ta agrada Dios, ni tampoco su mayornan.
Hopi biaha hobennan ta tuma decision emocional, pensando cu ta asina ta amor, y ta hinca nan curpa cu muher of homber sin pensa riba mayan, y nan mayornan kier hala nan atencion, pasobra e mayornan a biba caba, y nan sa kico ta kico, pasobra amor no ta emocion, amor no ta bon tipo, ni tampoco auto bunita, ni tampoco bon trabao, amor ta respet,amor ta pasenshi, y amor ta nifica trata hende bon.
Un conseho ta bay na tur hoben sea mucha muher of mucha homber, no drenta cu ningun hende, cu bo ta mira cu e no ta trata su mayornan bon,no tuma parti pe, pero busca drechi pa bo sa bon, bon pasobra un hende cu no ta respeta su mayornan lo no respeta abo tampoco.
Dios ta resiti e orguyosonan , ma ta duna gracia na e humildenan.
Mientras bo ta biba bao di dak di bo mayornan bo mester respeta, pero ora bo casa of bay biba riba bo mes esey no ta nifica cu respet a caba, bo mester duna ehempel di educacion cu bo a ricibi.
Mal actitud di hoben, ta haci dolor.
Sinceramente, Pastor Marcel Balootje
