Riba diamars 21 di april, Amber van Veghel a obtené su doctorado (PhD) na Universidad di Aruba y KU Leuven (Bélgica). El a haci investigacion riba un tema cu ta toca bida diario na e islanan directamente: cuminda. Den su investigacion multidisciplinario, el a analisá tanto e impacto ambiental di importacion di cuminda como tambe el a traha un resumen sistematico di investigacionnan riba cuminda na e islanan ABC.
E topico aki ta relevante pasobra consumo di cuminda ta causa te cu un di tres parti di e emision mundial di CO2 y, pues, ta contribui na cambio di clima. Van Veghel a mira e cadena completo – for di produccion te cu y llegada na e islanan – y a calcula den detaye e emision di CO2 di transporte aéreo via avionnan di pasahero cu ta bula for di Hulanda pa Aruba. E aproximacion integral aki ta haci su investigacion innovador tanto pa e islanan como pa e mundo academico.
Ora nos mira e “cuadro mas grandi”, nos por reduci e emision di CO2 di nos consumo di cuminda door di evita productonan cu ta bin cu avion, carni y producto di lechi (specialmente carni di baca), y productonan pa cual a tuma lugá deforestacion, manera cierto productonan di chocolate pero tambe carni di baca for di Suramérica. Na mes momento, tin facilidadnan pa reduci e impacto aki, por ehempel door di scoge mas biaha pa pollow en bes di carni di buey, of door di come mas a base di mata.
“Precies pasobra nos ta asina dependiente di importacion, e escogencianan den loke nos ta come – door di tanto habitante como bishitante – ta haci un gran diferencia,” segun Dr. Van Veghel.
Ademas, Van Veghel tabata e prome cu a inventarisá sistematicamente e investigacionnan existente riba cuminda na e islanan ABC, a base di analisinan di nuebe database local y internacional. For di esaki a resulta cu e cantidad di estudio a crece fuertemente den e ultimo dies añanan y cu e temanan ta amplio: for di patronchinan di alimento y coleccion di awa di yubia pa agricultura, te cu e reto- y oportunidadnan pa mas produccion local di cuminda.
Van Veghel a cuminsa su trayecto di promocion na aña 2020 na KU Leuven, den colaboracion cu Universidad di Aruba den cuadro di e programa SISSTEM. E ta e di dos studiante di e islanan cu ta promové den e programa aki. Su promocion tabata bou di guia di promotor prof. Annemie Geeraerd Ameryckx (KU Leuven) y co-promotornan prof. Salys Sultan (Universidad di Aruba) y dr. Renske Pin (RE-Quest).
Entre 2020 y 2024 el a biba y traha na Aruba, caminda el a duna les tambe. Entre tanto el a regresa Corsou, caminda e ta continua su trabou riba tereno di cuminda y sostenibilidad via su propio practika di investigacion y conseho, TCR.
A conclui e promocion cu un ovacion formal di pia. Despues di esaki, a entrega su tesis na Gobernador di Aruba.
E tesis ta disponibel digitalmente gratis y por fia esaki via e bibliotecanan di Universidad di Aruba y Biblioteca Nacional Aruba. Pronto lo e ta disponibel tambe na Boneiro y Corsou.
Personanan interesa por sigui explora e investigacion durante presentacionnan dia 11 di mei na University of Curaçao y dia 17 di juni durante e Dutch Caribbean Research Week na Universidad di Aruba.
