DEPORTES – Diasabra anochi a tuma lugar den T Mobile Arena na Las Vegas, Nevada un programa interesante di boxeo
caminda e pelea principal tabata entre 8 biaha campeon mundial di boxeo Manny Pacquiao y Yordenis Ugas.
Manny Pacquiao tabata den busca di sigui haci historia, e pelea programa algun luna pasa tabata contra Errol
Spence Jr. pero pa motibo di un lesion e pelea aki a wordo posponi y Yordenis Ugas a haya oportunidad di
defende su corona, cual faha e la gana como titulo vacante, cual titulo tabata di Manny Pacquiao cu no a
logra defende esaki den un aña.
Ambos boxdo a priminti di subi ring bon prepara y a bisa cu kizas e pelea aki lo termina pa knockout.
Manny Pacquiao tabata mustra di ta bon den condicion fiscico semper, pero realidad di bida tambe a
cuminsa hunga rol den su contra, edad di Manny Pacquiao a subi y no ta mes un liher mas riba ring, den
prome parti di pelea Manny tabata tira hopi golpi, pero mayoria di nan no tabata tin efectivo of tabata
golpinan cu no tabata conecta solido na curpa y cara di Ugas.
Mientras cu roundnan tabata pasa Yordenis Ugas su golpinan tabata mustra mas efectivo y mas fuerte, e no
tabata tira golpi na mas un cantidad cu Pacquiao, pero locual e tabata tira tabata haci daño.
Ultimo parti di pelea, por a mira cu tempo no ta pordona y ningun boxdo por scapa di esaki, Manny Pacquiao
su tempo como boxdo professional ta mustra di ta yegando su fin, Yordenis Ugas a bringa un pelea hopi
inteligente y cu golpinan mas efectivo.
E pelea aki no a bay pa knockout manera e boxdonan a pronostica y a bay over pa decision di juez.
Juez Patricia Morse Jarman a score 115-113, Juez Steve Weisfed y Juez Dave Moretti a score e pelea 116-112
na fabor di e ganador pa decision uniname Yordenis Ugas di Cuba cu a retene su titulo.
Na final di pelea durante entrevista Ugas a declara cu hende nan a bisa cu pa e ta campeon di WBA e mester
a gana e campeon original di WBA y ta esey e la bin pa haci tambe.
Manny Pacquiao den su enfrevista a declara cu e no tabata prepara pa estilo di pelea aki y cu e la train pa
otro estilo di pelea, pero esaki ta boxeo, tempo no ta pordona y cu kizas esaki lo por ta su ultimo pelea riba
ring di boxeo.
Aki un paar di luna, Manny Pacquiao ta anuncia si e lo pone su mes disponible pa bay eleccion pa president di
su pais Philippines.
