ORANJESTAD – Fraccion di MEP a expresa nan indignacion total despues di a ricibi e contestanan oficial di Minister Gerlien Croes (Futuro) relaciona cu su viahenan pa Hulanda. E documento, cu mester a duna claridad riba gastonan y metanan di e viahe, a keda cataloga como un berguensa pa pueblo debi na e falta di contenido y e evasion constante di e ministernan.
Den e contesta oficial riba 13 pregunta presenta pa Statenlid Evelyn Wever-Croes, Minister Gerlien Croes a scoge pa uza un tactica cu a keda mal ricibi den Parlamento. Na luga di duna detayes riba cu ken el a papia, kico tawata e resultadonan huridico, of si a cera acuerdonan nobo, e minister a limita su mes na skirbi repetidamente: “Zie vraag 1”.
Un mofa pa Parlamento
Pa e fraccion di MEP, esaki no ta solamente un falta di respet pa e organo legislativo, sino un insulto na e votador cu a kere den e promesa di “politica nobo” y “transparencia” cu e minister mes tawata predica. Parlamentario Dangui Oduber a cuestiona formalmente e falta di seriedad di Minister Gerlien.
Scondemento: Preguntanan clave tocante e resultadonan di maneho y e instancianan cu a wordo bishita no a wordo contesta individualmente.
Falta di Transparencia: Mientras pueblo ta pidi claridad riba gastonan di viahe y uzo di jet priva, e contesta di e minister ta keda ausente.
Contradiccion Politico: E minister ta fayando barbaramente den e mesun standardnan cu e mes a exigi den pasado ora e tabata den oposicion. E tabata grita DURO riba transparencia, pero awor e la lubida su gritonan.
“Politica Nobo” of mesun bieu?
Esaki te politica nobo cu 7000 persona a vota pe? Politica “zie vraag 1” ?
E pueblo awor ta keda cu e duda: Pakico tanto scondemento? Si e viahenan tawata pa bienestar di Aruba, pakico no por duna un relato detaya di e resultadonan y e gastonan envolvi?
