Un famia por ta rico y ala vez pober pasobra tin palabra sushi den cas, y no tin amor y comunicacion den famia.
Un hende cu no por respeta su propio boca, ta perde hopi amistad.
Den un cas caminda tin zundramento constant educacion di yuinan ta baha di nivel.
Muchanan cu lanta den pleito constant di famia, lo tin problema riba caya , pasobra nan ta kere cu tur cos mester resolve via di pleito y discucion.
Cuanto hende no a perde nan trabao pa motibo di nan boca, cu ta papia palabra malo constant, cuanto hende no a hinca nan curpa den problema door di papia malo di otro hende y ofende hende cu nan no conoce.
Un Cristian cu ta papia palabra malo ta haci danjo na su testimonio.
Un maestro of maestra di scol cu ta papia palabra malo ta duna mal ehempel.
Un polis cu ta papia palabra malo, ta lubida cu e mester ta un ehempel di respet.
Un deportista cu ta papia palabra malo, lo tarda pa bira un profesional.
Zundramento y palabra sushi no ta yuda ningun hende cu nada, simplemente ta un plan diabolico pa rebaha e ser humano.
No laga ningun palabra danino, sino solamente palabra cu ta bon pa edificacion, conforme e necesidad di e momento, pa esaki por duna gracia na esnan cu ta tende.( Efesionan 4:29).
Profeta Isaias tabata un homber di lipnan impuro ( Isaias 6:5-8 bibando meymey di un pueblo di lipnan impuro, y Senjor a pasa carbon sendi na su lipnan, y asina su inikidad a wordo kita, asina importante ta pa nos no ta papia palabra malo, pa nos lipnan ta puro, pa asina Senjor por usa nos, pasobra no ta locual nos ta come ta haci nos lipnan impuro, ta locual ta sali for di nos boca ta haci nos lipnan impuro.
Ta masha importante e control riba nos vocabulario, nos expresion tanto di palabra y di curpa, pasobra tur esey ta parti di nos educacion.
Decencia den cas ta importante, ta identifica e cas como cas di hende drechi, decencia den cas ta atrae e presencia di Dios, pasobra Dios ta un Dios di orden, y un vocabulario decente, tur momento ta trece alegria, ta haci curason contento, y union y pas ta reina.
Miho un pida pan seco, cu trankilidad, cu un cas yen di coi come, cu pleitamento (Proverbionan 17:1).
Un contesta suave ta kita rabia, ma un palabra skerpi ta lanta rabia.(Proverbionan 15:1).
Manera carbon ta pa carbon sendi, y palo pa candela, asina hende pleitado ta pa forma pleito.( Proverbionan 26:21).
Esaki ta locual Dios kier pa sosode den tur famia:
Ma awor boso tambe mester pone tur esakinan un banda: rabia , furia, malisia,calumnia,y palabra sushi,for di boso boca. No ganja otro, como cu boso a pone un banda e hende bieu cu su practicanan malbado.( Colosensenan 3:8-9).
Laga boso palabranan ta semper cu gracia, sasona cu salo, pa boso por sa con boso mester contesta cada persona.( Colosensenan 4:8).
Nos tur ta na altura cu tin algo manera un plaga di palabra malo y falta di respet ta bayendo rond , y ta algo cu nos tin cu rechasa constantemente, pasobra ningun palabra malo ta bini di Dios.
E no ta parti di nos educacion e ta parti un trampa.
No laga palabra malo forma parti di bo vocabulario den ningun idioma, no sconde papia palabra malo na ingles, spanjo, creole of chines, pasobra dilanti di Dios e ta keda un pica.
Ban mantene un boca limpi y decente.
Sinceremente, Pastor Marcel Balootje
