“Si mi cay na caminda, gara e bandera y sigui cu e lucha” ~ Gilberto François ‘Betico’ Croes.

Prome Minister Evelyn Wever-Croes a cuminsa celebra Dia di Betico e siman aki cu bishita na varios scol na Aruba y ta sumamente contento y satisfecho cu e interes y conocemento cu e muchanan tin di Betico. Esaki ya ta un tradicion di e mandatario principal di nos pais dunando realse na e fecha natal y logronan di Gilberto François ‘Betico’ Croes.

25 di januari ta un fecha special pa Aruba. Un dia nacional na unda nos comunidad por goza di un dia liber. Un dia na unda nos ta recorda e fecha natalicio di nos Libertador Betico Croes. Scolnan, establecimentonan, ciudadanonan ta papiando di e dia aki. Sigur buscando con pa celebra un dia asina importante na Aruba. 25 di januari no solamente ta un dia liber, pero un dia pa para keto na dje y celebra hunto den union y positivismo e bida y logronan di nos Libertador, Betico Croes.

Prome Minister Evelyn Wever-Croes ta invita tur ciudadano pa celebra e dia importante aki. Ban hisa nos bandera y mustra nos orguyo di ta Arubano. Acudi na e celebracionnan cu tin rond di Aruba. Entre otro, Gobierno di Aruba, hunto cu Comision Celebracion Dianan Nacional (CCDN), lo tin e Manifestacion Cultural, diamars 24 di januari na Plaza Libertador G.F. Betico Croes for di 8:00 pm – 10:30 pm. Ya pa 6or di atardi, lo tin Caha di Orgel ‘Olga’, Presentacion Tipico ’Brindis’, Feria Culinario, Boca Dushi y Artesania.

Diaranson 25 di januari, Dia di Betico, lo tin e Ceremonia Protocolar cu lo cuminsa pa 9:00 di mainta na Plaza Libertador G.F. Betico Croes cu presencia di nos Gobernador, Ministernan, Parlamentarionan y invitadonan special. 

Prome Minister na ocacion di Dia di Betico, ta recorda un di e palabranan cu Betico a uza y semper a haci un impacto grandi ta ora cu el a bisa “Si mi cay na caminda, gara e bandera y sigui cu e lucha”. Esaki ta posibel cu union y positivismo. Premier di Aruba ta encurasha e pueblo di Aruba pa nos tur biba e palabranan di e gran estadistica aki den union pa traha riba reto y solucionnan. Cu positivismo pa nos logra surpasa tur reto y logra un miho bienestar pa nos pais.

“Laga nos gara e bandera y sigui cu e lucha. Den cada hogar tin lucha grandi cu ta tuma luga. Den nos pais tin luchanan cu ta tuma luga. Y esaki ta loke Betico tawata kiermeen, pa no laga nada stroba bo di yega locual ta bo meta. Pero tambe cu determinacion, den union y cu positivismo, nos sigui cu e lucha pa bienestar general di henter nos comunidad”, Prome Minister a expresa.

LEAVE A REPLY

Please enter your comment!
Please enter your name here