Solamente Dios tin e poder pa protega tur famia , contra e ola di maldad cu ta avansa rond mundo.
Division den famia,
Divorcio den famia,
Pleito den famia,
Falta di pordon den famia,
Crimen den famia,
Vengansa den famia,
Abuso den famia,
Incesto den famia,
Rabia den famia,
Y e falta di respet cu ta aumenta cada dia den famia.
Ta parce manera e enemigo ta jaag riba famia, pasobra caminda tin pleito y division e famia ey no por sirbi Dios, pasobra nan no por uni den oracion.
Tin hopi division pa motibo di placa, herencia,y falta di pordon, cosnan cu ta pasa cu bo ta puntra bo mes , ta posibel cu ruman cu ruman por trata otro asina?
Of ta posibel cu mayor y yiu por biba asina cu otro?
Palabra di Dios ta alimento pa nos bida, y den Isaias 41:10 e palabra di Dios ta bisa; No tene miedo pasobra Mi ta cu bo, no desmaya pasobra Mi ta bo Dios,lo Mi fortalesebo, si lo Mi yuda bo, si lo Mi sostene bo cu Mi man drechi di husticia.
Ta tempo pa tur famia uni bek den oracion, pasobra tur famia mester di proteccion di Dios, no laga ningun lugar habri pa e malbado por drenta, pasobra manera e palabra di Dios ta bisa: Boso adversario e diabel ta cana manera un leon cu ta grunja buscando ken e por devora.
Y e palabra di Dios ta hala nos atencion, bisando: Somete boso mes na Dios, resisti e diabel y e lo huy for di boso, hala serca Dios, y E lo hala serca boso.
Ta necesario pa Cristo Hesus ta na prome lugar den cada hogar, nos ta bibando den tempo trabahoso, ta parce manera hende no kier realisa esey, y ta sigi haci manera nan no tin mester di Dios, y ta duna diabel bentaha den nan bida y nan famia.
E aumento di droga , alcohol, y actonan di inmoralidad cu ta tuma lugar tur caminda, mester pone tur hende refleha riba Efesionan 6:10-18, pa nos sea fuerte den Senjor y den e forsa di Su poder, bisti e armadura di Senjor , pa boso por para firme contra e trampanan di diabel.
Senjor ta recorda nos pa keda firme den oracion , pa perservera tur momento, haci oracion un pa otro, y mas cu tur cos pordona otro y biba bon cu otro.
Urgentemente, tur famia mester bolbe bek na oracion, esaki no ta un yamada fanatico, pero un deber, un necesidad, cual nos tur ta mira, cu nos mester di Dios, den tur hogar, pa asina por bolbe bek na un bida sano.
Palabra di bendicion mester bolbe bek riba bida di nos yiunan, riba esposo y esposa, palabra nan cu ta duna curashi y lanta fe den den henter cas, pasobra sin fe ta imposibel agrada Dios.
Materialismo a aumenta, ciencia a aumenta, hende ta kere mas den placa cu den Dios, hende ta biba di un forma ireconciliabel cu otro, nan ta bon cu tur amistad pafo di cas, mientras cu den cas, nan no ta papia cu otro.
Ma Senjor ta fiel,y E lo fortalese bo y warda boso di e malbado ( 2 Thesalonisensenan 3:3).
Laga boso karakter ta liber di amor pa placa, y sea contento cu loke boso tin, pasobra E mes a bisa: Nunca lo Mi no bandona bo, y nunca lo Mi laga bo desampara.( Hebreonan 13:5).
E amor di Dios tey pa tur esnan cu ta kere y ta busca Dios di henter nan curason.
Dios nunca ta bandona nos.
Sinceramente,Pastor Marcel Balootje
