Tur hende por ripara con sistema traha pa man di hende ta laga di desea.

No ta nada nobo si bo bay un compania grandi pa hanja servicio y bo ta tende cu bo tin cu warda pasobra e computer ta down.

Vuelonan ta wordo cancela na gran escala, pa motibo cu e sistema di comunicacion a faya of hackers ta bezig.

Bo ta traha afspraak pa un servicio, pero ora bo yega na e departamento bo tin di warda, pasobra tin problema cu computer.

Bo auto tin problema, bo ta hiba bo auto garashi. Awor e computer cu mester chek e auto no ta funcionando.

Pa motibo di fayo di computer un hende por perde su bida.

Awendia nos conoce varios tipo di gera:

Gera militar.

Gera biologico,

Gera economico.

Gera digital.

Gera Spiritual.

Gera Politico.

Palabra di Dios ta bisa lo siguiente: Si boso a wordo lanta cu Cristo anto,sigi busca e cosnan di ariba,caminda Cristo ta sinta na man drechi di Dios,

Pone boso mente riba e cosnan di ariba, y no riba e cosnan cu ta riba tera.Pasobra boso a muri y boso bida ta scondi den Cristo den Dios.( Colosensenan 3:1-3).

Tambe ta para scirbi: No stima mundo ni e cosnan cu ta di mundo. Si un hende ta stima mundo, e amor di e Tata no ta den dje. Pasobra tur loke tin den mundo,e deseo di carni, y e deseo di wowo,y e orguyo di bida, no ta bini di e Tata, sino di e mundo.

Y e mundo ta pasa bay y su deseonan tambe,ma esun cu ta haci e boluntad di Dios,ta permanece pa semper.( 1 Juan 2:15-17)

Mas ainda nos tur tin di corda locual tin para scirbi den Romanonan 12:2 bisando: Y no sea conforme e mundo aki,ma sea transforma pa medio di e renobamento di boso mente,pa boso por comproba, kico ta e bon,y agradabel y perfecto boluntad di Dios.

E manera cu e sistema di mundo ta bayendo ta exigi pa nos hala mas serca Dios, 

Haci Su boluntad, mantene un bida di oracion firme, aparta for di maldad, huy for di fornicacion y adulterio,no asocia, ni tampoco sostene maldad, pone orguyo un manda, rechasa tur clase di inmoralidad, busca pas y santidad pa nos bida.

Pasobra nos tin di corda locual ta para scirbi den Juan 15:5 cual ta bisa: Ami ta e mata di wijndruif, boso ta e ramanan,esun cu keda den Mi,y Ami den dje , esey ta duna hopi fruta, pasobra separa di Mi boso no por haci nada.

Hesus a bisa , Ami ta e caminda, e berdad y e bida, ni un hende no ta bin serca e Tata sino pa medio di Mi. ( Juan 14:6)

Hesus a bisa: Bin serca Mi tur cu ta cansa y carga y lo mi duna boso sosiego.

Awor wak riba mundo cuanto hende ta cansa mentalmente y ta purba tuma tur sorto di tratamiento, cientifico y farmaceutico ta purba tur sorto di remedi, hasta bruheria y hypnotismo a aumenta barbaramente, tratando di duna solucion na e problema di salud mental, y te ainda hende no kier acepta e palabra di Hesus den nan bida pa nan tin pas.

Hende kier pa Dios yuda nan, pero cu nan conducta, y nan mes palabra, y nan falta di fe y temor di Dios, nan wowo ta wordo tapa door di e maligno, y asina nan no ta mira kico Dios por haci pa nan.

Hende ta balora material, mas cu Dios, y nan ta lubida cu material ta temporal, Cristo Hesus ta eterno.

Sinceramente, Pastor Marcel Balootje.