Departamento di Infrastructura y Planificacion (DIP) a caba di saca e cobransanan di erfpacht di aña 2025. Mientrastanto Departamento di Impuesto a ricibi e datonan di e cobransanan aki for di DIP y awor ta cla pa cuminsa cobra e sumanan di erfpacht di aña 2025.
E fecha oficial di e cobransa menciona ta 1 di october 2025. E ultimo dia pa haci pago ta 15 di october 2025. E contribuyentenan por acudi na un oficina di Departamento di Impuesto pa haci pago of por haci esaki online via banco.
Areglo di pago
Si acaso un contribuyente no ta alcansa pa haci e pago na tempo, ta consehabel pa pidi pa un areglo di pago. Pa esaki mester tuma contacto cu Departamento di Impuesto sea via telefon of e-mail.
Pregunta?
Pa informacion, pregunta of obhecion tocante e cobransa, por tuma contacto cu Departamento di Infrastructura y Planificacion (DIP).
Pa informacion of pregunta tocante pago di e cobransa, por tuma contacto cu Departamento di Impuesto na 5227424 of 5227423 of por manda un e-mail na info@impuesto.aw.
