Tur hende mester tene bon cuenta, con nan ta expresa nan mes, con nan actitud, nan bodylanguage ta sali pa dilanti, pasobra especialmente nos muchanan y nos hubentud ta wak y ta for di nos cu ta grandi nan ta cohe experiencia.
Hopi biaha e ta keda manera un show ora bo ta mira lidernan den comunidad, ta expresa nan mes, ora bo ta mira con mayor ta expresa su mes dilanti di nan yiunan, y ta mes un hendenan cu ta spera bon comportacion den nos hubentud , y bon comportacion den tur hogar.
Mal ehempel no ta cos di broma cune, e ta un mal simia cu semper lo duna su fruta, pasobra una bes bo duna mal ehempel, mal ehempel ta wordo desmostra, pasobra mal ehempel no ta bini di Dios, e ta bini for di fuente di tur scuridad, e ta bini di diabel.
Palabra malo, expresion di curpa, tiramento di cos na cara di otro, biba den pasado di otro, kere cu bo ta mas cu otro hende, kere cu abo ta bon y tur sobra ta malo, discriminacion, fariseo,hipocresia, tur esey ta mal ehempel cu hende mester abstene di dje.
Tene cuenta e ehempel cu abo como mayor ta duna dilanti di bo yiunan, pasobra abo ta e mentor,ta riba abo nan ta wak, ta den bo nan ta kere, ta abo ta e lider di bo hogar, y si bo ehempel ta malo, scuridad lo reina den bo cas, y por fabor no culpa ningun hende, pero drecha bo asunto.
Santiago 1:7 ta bisa : Tur bon regalo y tur don perfecto ta for di ariba , y ta baha bini for di e Tata di lusnan, serca kende no tin variacion ni sombra di cambio.
Sea un fabricante di bondad, dunando un bon ehempel y no un fabricante di maldad, dunando mal ehempel, cual ta hiba na rabia, odio y amargura.
Palabra malo, falta di pordon,discucion constante, competencia den inmoralidad, tur esey tin su efecto negativo riba nos hubentud.
Den tur cos presenta bo mes como un ehempel den bon obra,cu puresa den doctrina,cu dignidad, cu palabra cu no por wordo condena,pa e oponente wordo brongosa,sin cu e tin nada malo di bisa di nos.( Tito 2:7-8).
Pablo ta bisa Timoteo:No laga ningun hende menosprecia bo hubentud,ma mas bien den palabra, conducta,amor , fe y puresa. Demostra bo mes di ta un ehempel pa esnan cu ta kere.( 1 Timoteo 4:12).
Con un hoben por demostra locual e no a ricibi, pesey ta deber di nos como mayor pa lanta e mucha den e palabra y disciplina di Senjor, instrui e mucha for di chiki, y nan grandi e lo no lubida.
Laga boso conducta ta excelente meymey di paganonan, y asina cu ora nan calumnia boso,como malechor,nan por, pa medio di boso bon obranan,cu nan ta observa, glorifica Dios den e dia di bishitacion.( 1 Pedro 2:12).
Bon ehempel ta e lus den nos bida, pasobra bon ehempel ta bini di Dios, y semper e ta demostra claridad den tur cos, especialmente den nos expresion.
Nos palabra mester ta un fuente di bon ehempel, nos palabra y conducta positivo mester ta un disenjo di bondad, amor y respet pa nos hogar, y pa tur esnan cu ta biba rond di nos, Laga nos ta reconoci pa hende di bon ehempel den pueblo..
Laga boso lus briya dilanti di hende,di tal manera cu nan por mira boso bon obranan y glorifica boso Tata cu ta den cielo. ( Mateo 5:16).
Bon ehempel ta bini di Dios,y Dios mester goberna den nos bida.
Sinceramente, Pastor Marcel Balootje.
