Entrante 1 di juli 2025, Banco Central di Aruba (CBA) a mantene e tasa di reserva obligatorio pa banconan comercial na 12,5%. E decision aki riba e maneho monetario ta mantene e balansanan minimo cu banconan comercial local mester tene na CBA.
Puntonan principal:
- Incertidumbre mundial economico
E incertidumbre mundial na e momentonan aki por impacta e reservanan di divisa y inflacion, cu por causa desviacionnan for di e proyeccionnan cu ta fungi como e punto di salida (“baseline”).
- Reservanan adecua apesar di crecemento den credito
Te cu april 2025, reservanan a surpasa substancialmente e normanan cu CBA ta mantene, apesar di un aumento den credito (+0,8%). Ademas CBA ta anticipa cu e reservanan di divisa lo crece y keda suficientemente adecua.
- Un inflacion abou
Na april 2025, e inflacion midi na final di luna contra e mesun luna di e aña anterior tabata 0,4%. Riba un promedio anual e inflacion a alcansa 1,3%.
- Likides excesivo eleva
Aunke likides excesivo di banconan comercial local a baha na mei 2025, e nivel ta keda eleva.
CBA ta monitor indicadornan monetario y economico di cerca y lo ahusta su posicion di maneho monetario pa sostene e tasa fiho di e florin na e dollar Mericano.
Pa mas informacion por manda un email na: communications@cbaruba.org
