Credito domestico a crece: Resumen di e relato mensual di augustus 2026

Desaroyo monetario 

Den luna di augustus 2026, e cantidad di placa den circulacion a expande cu Afl. 123,7 miyon te na Afl. 7.644,6 miyon, compara cu juli 2026. Esaki a resulta for di un subida den e activo domestico netto (+Afl 134,1 miyon) y un bahada den e reserva di divisa netto (-Afl. 10,4 miyon).

E desaroyo den e activo domestico netto a wordo causa pa un subida den credito domestico (+Afl. 143,9 miyon) y un bahada den transaccionnan no relata na credito (-Afl. 9,8 miyon). E subida den credito domestico a resulta for di mas credito bancario na e sector priva (+Afl. 105,6 miyon) y mas credito bancario netto na e sector publico (+Afl. 38,3 miyon). E expansion den credito bancario na e sector priva a resulta for di mas credito na empresa (+Afl. 82,1 miyon), hipoteca pa vivienda (+Afl. 14,8 miyon), y  credito na consumidor (+Afl. 8,6 miyon). E subida den credito bancario netto na e sector publico ta wordo atribui na menos deposito di gobierno (-Afl. 38,2 miyon). 

Inflation

E nivel general di prijs, cu ta wordo midi door di e indice di prijs di consumo, a registra un subida di 2,7% den e luna di augustus 2026 compara cu augustus 2025. E contribuyente principal na e aumento aki tabata e categoria  “Transporte”. Pa loke ta trata e promedio anual di e tasa di inflacion, esaki a registra 1,0% na augustus 2026, compara cu 0,7% na juli 2026.

Entrada di Gobierno

Entrada total di gobierno a suma Afl. 133,5 miyon na augustus 2026, cual ta Afl. 33,9 miyon menos cu e mesun luna di e aña anterior. Esaki a resulta for di un bahada den entrada no relata na impuesto (-Afl. 51,1 miyon) y un subida den entrada di impuesto (+Afl. 17,2 miyon).

E aumento den entrada di impuesto a wordo causa principalmente pa mas entrada for di impuesto riba divisas (+Afl. 10,5 miyon), impuesto riba salario (+Afl. 3.2 miyon), y e asina yama “turnover tax” (B.B.O./B.A.V.P.) (+Afl. 2,7 miyon). 

Turismo

Na augustus 2026, e cantidad di turista a registra 145.750 turista, cual ta 13.022 mas bishitante (+9,8%) compara cu na augustus 2025. E mercadonan Latino Americano, Norte Americano, y Europeo a crece cu 10.506 bishitante (+47,8%), 1.565 bishitante (+1,6%), y 1.209 bishitante (+16,6%), respectivamente. 

E relato mensual completo ta disponibel ariba website di BCA www.cbaruba.org