Prome cu Cristo Hesus a wordo aresta E haci oracion pa tur creyente, den un palabra bisa pa nos tur, cu awendia ta kere den Cristo Hesus bisando:
Mi no ta pidi pa esakinan so,ma tambe pa esnan cu ta kere den Mi pa medio di nan palabra. Pa nan tur por ta un, mescos cu Abo, O Tata , ta den Mi , y Ami den bo, pa nan tambe por ta den Nos,pa mundo kere cu Abo a manda Mi.
Y e gloria cu Bo a duna Mi, Mi a duna nan,pa nan ta un mescos cu Nos ta un.Ami den nan y Abo den Mi, pa nan por ta perfecto den unidad, pa mundo por sa cu ta Abo a manda Mi, y cu Bo a stima nan mescos cu Bo a stima Mi.
Division, rasismo, orguyo y arogancia , no ta bini di Dios, diabel semper a usa rasismo, pa trece division entre hende, e tin mil y un anja ta ganja hende cu asunto di color, y hopi a cay den e trampa di diabel, y tin hopi creyente, hendenan cu mester sa mihor ta proclama division pa medio di rasismo, y tin hende cu ta hinca den nan cabes, y haci e cos ey como un forti den nan mente cu pa motibo di nan color nan no por logra cierto meta den nan bida.
Hesus a bisa, bon serca Mi tur cu ta cansa y carga y lo mi duna boso sosiego, ( Mateo 11:28). Palabra di Dios ta bisa den Juan 3:16: Pasobra Dios a stima a stima mundo asina tanto,cu E a duna Su Yiu unigenito, pa ken cu kere den dj’E no bay perdi, ma tin bida eterno.
Den esaki no tin cuenta di color, ni cabey, ni rasa, tur cu kere den e Yiu unigenito di Dios cual ta Cristo Hesus lo tin bida eterno.
E malbado cual ta e diabel ta campeon den troce palabra y asina causa division entre hende, cuminsando for di den cas di famia, na trabao, den iglesia, y tur caminda cu hende ta acepta su bagamunderia.
Arma mas grandi riba mundo cu ta trece division ta e locual tur hende conoce como “Religion y “Politica”, Politica tin asina forsa cu den un matrimonio caminda dos hende ta pretende di ta stima otro un mundo, pero politicamente nan ta separa, pasobra cada un ta simpatisa cu su partido, asina leu cos por yega.
Pablo ta bisa den Romanonan 16:17-18: Awor mi ta bisa boso, rumannan tene na bista esnan cu ta causa division,y strobacion contrario na e ensenansa cu boso a hanja, y aparta boso for di nan, pasobra sorto di hende asina ta esclabo, no di Senjor Cristo, ma di nan mes apetit, cu nan palabranan suave nan ta ganja curason di e inosentenan.
Den Judas 1:18 ta para scirbi: Cu nan tabata bisa boso , cu den e ultimo tempo lo tin bofonadonan cu ta sigi tras di nan pasion perverso. Esakinan ta esnan cu ta causa division, kendenan sensual cu no tin e Spirito.
1 Corintionan 3:3 ta para scirbi: Pasobra ainda boso ta carnal.Pasobra como cu ta existi envidia, pleito, y division entre boso, no ta carnal bos ta, y no ta manera tur hende boso ta cana?
Esun cu ta bisa cu e ta den lus sinembargo ta odia su ruman, ta den scuridad te ainda. ( 1 Juan 2:9).
Un hende perverso ta sembra pleito,y un hacido di redo ta separa amigonan intimo.( Proverbionan 16:28).
Sinceramente, Pastor Marcel Balootje
