Esnan den organisacion, den social y docentenan, ta nan ta duna lectura y charlanan tocante medionan pa tuma control di saludsexual y di anticonceptivonan na e hobennan? Nan ta sinja y ta promove algo cu no ta un educacion Cristian y cu no ta bini di Dios. Ta ki ehempel y educacion esey ta? Esey ta pa promove libertinahe sexual den nos hubentudnan? Educacion sexual mester ta basa segun Dios Su boluntad y den un bida Cristian. Mester sinja tur e hobennan, cu relacion sexual mester sosode solamente den casamento, den e Sacramento di Matrimonio cu Cristo-Hesus a institui, lesa den Bijbel Mateo 19: 5-6, loke Cristo-Hesus ta bisa: “P’esey un homber lo laga su tata y su mama, pe uni su mes cu su muher y e dosnan aki lo bira un curpa. Di manera cu ya nan no ta dos mas, si no un solo curpa y loke cu Dios a uni, no ta permiti hende di separa.” Esaki ta e casamento den e Sacramento di Matrimonio pa Dios den Misa y den e union aki di un solo curpa ta significa, cu Dios ta uni e pareha den nan relacion sexual, pa satisface nan curpa y pa lanta famia. E relacion sexual mester sosode solamente den e Sacramento di Matrimonio, pasobra tur otro relacion sexualnan haci pafor di e Sacramento di Matrimonio, ta condenabel pa Dios den fierno, lesa den Bijbel 1 Corinthionan 6: 9-10, esaki ta e relacion sexualnan prohibi cu ta e pika di fornicacion y e destino final ta den fierno. Den e di 9 Mandamento di Dios ta bisa: “Lo bo no comete e pika di fornicacion y e pika di deshonesto.” Den e Ley aki Dios ta prohibi tur sorto di relacion sexual pafor di e Sacramento di Matrimonio lesa Bijbel 1 Corinthionan 6: 18 – 20. Tambe e pika di deshonesto y di inmoralidad, ta esnan cu ta deshonra nan mesun curpa den e mesun sexo lesa Bijbel Levitico 18: 22 / 20: 13.
Tur sorto di anticonceptivonan, ta contra di Dios Tata Su procreacion humano. No ta pa hende dicidi esey y ni pa husga tocante di bida humano, pasobra ta Dios Tata ta E Autor di bida y no hende. Lesa den Bijbel Genesis 38: 6-10, na unda Dios Tata a condena Onan na morto, pasobra Onan tabata benta su spermanan afo pa no laga su senjora sali na estado. Asina aki tambe, Dios ta condena, na tur esnan cu ta usa tur sorto di anticonceptivonan pa no sali na estado. Dios ta condena e hombernan cu ta haci masturbacionnan y nan ta benta nan sperma afo, hombernan cu ta usa condoom pa benta nan sperma afo. Muhernan cu ta usa pildonan pa no sali na estado, muhernan cu ta opera, cu ta konopa, cu ta usa spiral pa no haya yiu etc.
Hende mester compronde bon, cu Dios Tata a traha hende muher pa planea famia hunto cu su casa den e Sacramento di Matrimonio, ta pesey hende muhernan tin nan ciclonan y nan periodonan cu ta e dianan di fertilidad, e dianan di infertilidad y dianan di menstruacion. Hende muher ta planea nan famia den e ciclonan y den e periodonan y no den e anticonceptivonan cu ta bini di satanas. Na mundo esnan den organisacionnan satanico bao di un capa, ta nan ta bini cu e anticonceptivonan pa hende sera porta pa Dios Su procreacion humano y pa promove sexualidadnan prohibi den nos hobennan. P’esey tur esnan cu ta stroba Dios Su Autor di bida of ta sera porta y ta promove libertinahe sexual y sexualidadnan prohibi, nan ta comete pikanan mortal y condenabel. Compronde bon, cu ta Dios ta duna bida y alma, pa nos bini den e mundo aki y ta Dios ta yama nos, pa nos laga e mundo aki. Educacion sexual pa e hobennan mester bini for di cas, na unda cu tata y mama ta papia cu nan yiunan. Tambe educacion sexual pa hobennan, mester bini for di esnan den cooperador pastoral den Parokia, pastoornan of di hendenan Cristian cu sa di Bijbel. Educacion sexual mester ta algo priva y personal den famia y no di esnan cu bo no sa ken nan ta, nan no sa teologia, nan no ta Cristian, nan no sa nada di Bijbel y nan no sa e 10 Mandamentonan di Dios. Anto ta nan ta bini pa sinja bo yiunan tocante, sexualidad, safesex, saludsexual y anticonceptivonan.
Awor e pregunta ta: Ta hende ta dicidi of ta Dios ta dicidi tocante sexualidad? Of mihor bisa, ta na unda bo kier bay despues di morto? Den e lugar cu bo mes a crea y dicidi of den e lugar cu Dios a dicidi pa bo? Educacion na scol, nan no mester bini tocante, educacion sexual, uso di anticonceptivonan y abortus. Laga e educacion sexual pa e mayornan, pa esnan den ccoperador pastoral, pa esnan studia den teologia, pa esnan spiritual y pa e pastoornan di parokia.
Scirbi pa Seferino Tromp
