E proposicion pa mara e salario minimo na bestaansminimum di Aruba a habri un debate importante den nos comunidad. E intencion di mehora poder di compra di nos trahadornan ta un meta cu merece atencion serio. Pero e pregunta cu nos mester haci ta: con nos ta logra esaki sin crea otro problemanan economico cu eventualmente por afecta e mesun trahadornan cu nos kier yuda?
Segun informacion publica, e proposicion ta contempla un aumento di salario minimo di aproximadamente Afl. 2.007 pa Afl. 2.700 pa luna, den tres fase. Esaki ta representa un aumento total di aproximadamente 34%.
Un aumento di e magnitud aki lo tin impacto no solamente riba trahadornan, sino tambe riba empresarionan, consumidornan y economia di Aruba den su totalidad.
Un di e preocupacionnan principal ta e posibel efecto riba costo di bida. Ora salario minimo subi considerablemente, empresarionan cu ta depende di personal mester absorbe un aumento di nan gastonan operacional. Dependiendo di nan situacion financiero, algun por absorbe parti di e costo, mientras cu otro por haya nan mes obliga di aumenta prijsnan di producto y servicio pa por cubri esaki. Si esaki sosode riba un escala grandi, e aumento di salario por perde parti di su beneficio pa motibo di inflacion.
Esaki ta particularmente importante pa Aruba, unda costo di bida ya ta un preocupacion grandi pa hopi famia. Ademas, bestaansminimum ta calcula tumando na cuenta costo di necesidadnan basico. Si e prijsnan aki subi, e bestaansminimum mes por sigui subi. Esey ta crea e riesgo di un circulo den cual salario ta subi, prijsnan ta subi y e meta cu nos ta purba alcanza ta move cada biaha mas halto.
Un otro preocupacion serio ta e impacto riba micro, empresarionan chikito y mediano. E grupo di empresarionan aki ta forma un parti importante di nos economia. Nan ta crea empleo, ta inverti den nos comunidad y ta contribui na desaroyo economico di Aruba. Pero no tur empresa tin e mesun capacidad financiero. Un empresa grandi por tin mas posibilidad pa absorbe aumento di costo salarial. Un restaurant chikito, un tienda di bario, un salon di beyesa of un empresa familiar no tin e mesun capacidad.
Un aumento considerabel di costo di personal por obliga algun empresa pa limita dunamento di trabou, reduci ora di trabou, pospone inversion of, den casonan extremo, sera nan porta. Esakinan ta riesgo cu mester wordo investiga, no consecuencianan cu nos por declara como inevitabel.
Nos mester wak tambe con un aumento di salario minimo por afecta oportunidad di empleo. Si e costo pa contrata personal aumenta mas lihe cu productividad y entrada di un empresa, algun dunado di trabou por bira mas cauteloso pa contrata personal adicional. Esaki por afecta specialmente e hubentud cu ta buscando nan prome empleo y personanan cu tin poco experencia laboral. Na mesun momento, un salario mas halto por mehora motivacion, reduci cambio di personal y aumenta poder di compra. P’esey ta importante pa un estudio evalua tur dos banda di e medaya. Nos meta mester ta un economia cu ta paga salario digno, pero cu tambe ta sigui crea empleo y oportunidad.
E importancia di un analisis cuidadoso no ta algo nobo. Den documentacion oficial relaciona cu introduccion di salario minimo pa ora, Sociaal-Economische Raad (SER) a identifica posibel aumento di costo salarial, inflacion y efecto riba siguridad social y entrada di belasting. Raad van Advies tambe a señala importancia di analisa e consecuencianan financiero y economico di cambionan den sistema di salario minimo. E advertencianan aki ta relevante pa e debate actual, aunke e proposicion di 2027 ta un medida diferente cu mester su propio evaluacion. Ademas, informacion publica tocante e advies di SER di februari 2026 ta indica cu consulta cu partnernan social y medidanan complementario ta parti importante di e discusion.
E preocupacion no mester limita solamente na sector comercial. Un posibel aumento di prijsnan por afecta pensionadonan, famianan cu entrada limita y personanan cu no ta beneficia directamente di un aumento di salario minimo. Tambe mester investiga e posibel efecto riba costo di servicio publico, contratacion gubernamental y finansas di pais. P’esey un decision di e magnitud aki mester wordo acompaña pa un estudio di impacto economico y social cu ta transparente y accesibel pa comunidad. E estudio mester evalua diferente escenario, incluyendo aumento gradual, posibel efecto riba empleo, inflacion, competitividad di empresarionan y poder di compra real di nos trahadornan.
Un cambio asina importante merece participacion di tur sector involucra. Gobierno mester sinta na mesa cu representantenan di trahadornan, sindicatonan, gremio comercial, empresarionan y expertonan economico. E dialogo aki no mester ta solamente un formalidad. E mester sirbi pa identifica riesgonan, evalua alternativa y yega na solucionnan cu ta sostenibel. Mester considera tambe otro medidanan pa baha costo di bida, stimula productividad y duna sosten na empresarionan cu por haya dificultad pa absorbe un aumento salarial.
Aruba merece un economia den cual hende cu ta traha por biba dignamente di nan salario. Pero pa logra esaki, nos mester combina ambicion social cu responsabilidad economico. E pregunta no ta solamente cuanto salario minimo mester subi. E pregunta ta tambe cuanto e aumento lo costa, ken lo absorbe e costo y con nos ta evita cu e beneficio pa trahadornan wordo reduci pa aumento di prijsnan of perdida di oportunidad di empleo.
Un bon decision gubernamental ta uno cu ta considera tanto e beneficio cu nos kier logra como e riesgonan cu nos mester preveni. Nos trahadornan merece un salario digno. Nos empresarionan merece oportunidad pa sigui crece. Y Aruba merece decisionnan basa riba investigacion, dialogo y un vision economico sostenibel.
Rondel Heyliger, Partido Futuro
