No tin duda cu nos maestronan ta e wes’i lomba di nos sociedad. Nan ta forma, guia y motiva e generacion cu lo hereda Aruba mañan. Y sinembargo, despues di mas di 13 aña ta warda riba promesa sin accion, ainda nan ta sin un restructuracion salarial husto. Pa fraccion di PPA y Eduard Pieters, esaki ta un prioridad nacional y e ora ta awor!
Restructuracion husto y necesario
E ‘rechttrekking’ cu sindicato y comision a logra finalmente ta cla: no mas discriminacion segun tipo di enseñansa, sino salario igual pa tur cu tin un estudio di nivel HBO. Esaki ta e husticia basico cu centenares di maestro ta wardando riba dje. “Ta inhusto cu un maestro cu nivel di Master, cu a inverti aña di estudio, haciendo sacrificio, ta termina su nivel di Master y ta bay para bek den klas, sin por haya un florin di aumento,” Eduard a duna como ehempel di un situacion actual cu no ta motiva maestronan sigui profesionalisa.
Motivacion y calidad di enseñansa
Salario husto no ta solamente un tema di placa. Ta un tema di motivacion! Den tur pais di region, inversion den maestro ta clave pa calidad di enseñansa. Si Aruba no trata maestro cu dignidad, calidad di nos enseñansa lo sigui sufri. Sin maestro motiva, nos a debilitando nos futuro y sistema di enseñansa.
Promesa cu ta dura hopi aña
Di 2012 te 2025, cinco gobierno a trata e tema, pero ningun a duna un resultado final. Tur gobierno a instala comision, tur a saca nota, pero nada a cambia.
Punto di prioridad pa PPA
Den programacion di PPA, reconocemento y restructuracion salarial di maestro ta un punto central y di prioridad pa partido PPA. “Nos no por sigui traha riba base di promesa politico. Nos mester implementa. PPA ta compromete pa sigui presiona pa un plan di implementacion concreto y mas pronto cu ta posibel, pa un sistema cu finalmente ta motiva maestro pa sigui profesionalisa nan mes pa mehora calidad di enseñansa di Aruba,” Eduard a subraya.
Un yamada pa union
“Nos ta bisa cla: maestro no ta pidi favor, nan ta pidi pa husticia, respet y balorisacion. E comunidad mester uni atras di nan. Tata, mama, studiantenan, sindicato y nos politiconan, tur mester reconoce cu sin maestro, Aruba no tin futuro. Eduard Pieters ta yama pa un union fuerte, pa finalmente duna e respet y balor cu nos maestronan merece.
Pa conclui Eduard Pieters a expresa: “Nos mester stop cu wega politico y promesa sin cumpli. E maestronan ta luchando ya pa mas di 10 aña y nan merece respet y dignidad. E temponan di awendia y e retonan social emocional cu nan ta deal cu ne den klas diariamente, no ta manera antes. Pa fraccion di PPA, e lucha aki no ta un opcion, e ta un prioridad. Y e ora ta awor!”
