Parlamentario di AVP, Clifford Heyliger, ta exigi un intervencion urgente pa resolve e falta persistente di cita na Censo pa personanan cu a haya nan permiso di residencia y trabou di DIMAS. Segun e señalnan cu el a ricibi, tin casonan den cual e espera ya ta rond di un aña, mientras e personanan afecta ta sigui purba haci un cita online sin haya un fecha disponibel.
Pa Heyliger, e situacion a pasa e limite di loke por wordo acepta como un retraso administrativo. E consecuencianan ta afecta directamente bida di hende, nan posibilidad pa cuminsa traha y nan acceso na servicionan esencial.
“Ta wordo bisa cu tin falta di personal y cu e cantidad di peticion ta demasiado grandi. Pero despues di casi un aña, esey no por sigui ta e argumento pa un hende cu tin su permiso den man, pero ainda no por haya un fecha pa inscribi. Esaki ta inhumano y mester wordo soluciona awor,” Heyliger a expresa.
Consecuencia pa trahado
E parlamentario ta señala cu tin personanan cu a cumpli cu e proceso pa haya nan permiso, pero cu no por completa e siguiente paso pasobra e mesun aparato gubernamental no ta ofrece nan acceso oportuno na inscripcion.
Segun e casonan treci na su atencion, esaki ta crea obstaculo pa acceso na cobertura di AZV, pa habri un cuenta di banco y pa cuminsa traha. Alabes, dunador di trabou ta keda cu personanan prepara y dispuesto pa traha, pero cu nan entrada den servicio ta wordo obstaculisa pa falta di inscripcion.
“Ken ta asumi responsabilidad pa e daño cu e situacion aki ta causa? “E ciudadano a haci su parti y tin derecho riba un servicio publico accesibel, transparente y dentro di un termino razonabel.
Inscripcion na Censo no ta un fabor: ta un servicio esencial cu gobierno tin e responsabilidad di garantisa na esnan cu ta cumpli cu e rekisitonan. Ningun hende mester wordo obliga pa paga un intermediario of busca un contacto special pa haya acceso na un servicio cu ta su derecho.
Laga personanan durante lunanan sin cita y sin solucion ta desconoce e derecho ey y ta pone e consecuencianan di un fayoadministrativo riba schouder di e ciudadano,” Heyliger a enfatisa.
Den su preguntanan por escrito, fecha 30 di october 2026 y dirigi na Minister di Husticia, Integracion, Transporte Publico y Energia, Arthur Dowers, Heyliger ta pidi claridad tocante e cantidad di persona cu ta wardando, e duracion di e retrasonan y e medidanan cu a wordo tuma pa resolve nan.
Ken ta paga si un hende bira malo?
Un di e preocupacionnan principal di Heyliger ta e vulnerabilidad di personanan cu, pa falta di inscripcion na Censo, no por completa nan inscripcion na AZV.
E parlamentario ta pidi e minister splica kico ta pasa si un di e personanan aki bira gravemente malo of haya un accidente mientras e ta wardando un cita. E kier sa ken lo carga e gastonan medico y di hospital, y si e persona of su garante lo wordo confronta cu gastonan cu nan no por carga, mientras e retraso ta resulta di falta di acceso na un servicio gubernamental.
Pa Heyliger, e pregunta aki mester haya un contesta cla y un solucion concreto cu ta proteha esnan afecta.
Ta crea espacio pa abuso
Heyliger ta adverti tambe cu ora e via regular no ta accesibel, ta crea espacio pa intermediarionan ofrece supuesto acceso of facilitacion contra pago: un fenomeno cu e ta describi como un “shop in shop”.
Segun e parlamentario, e experiencia cu tramitenan di permiso ta mustra e importancia di evita cu un necesidad administrativo bira un oportunidad pa abuso.
“Un ciudadano no mester sinti cu e tin cu paga extra na un intermediario pa haya acceso na un servicio publico cu mester ta accesibel door di e canal regular,” Heyliger a declara.
E ta considera cu cualkier señal di cobro indebido, trato preferencial of facilitacion irregular mester wordo investiga, pa evita abuso y posibel corupcion.
Responsabilidad di Minister
Heyliger ta cuestiona si e direccion y organisacion di Censo ta suficientemente prepara pa adapta su servicio ora demanda aumenta of circunstancianan cambia. Pa e parlamentario, atende solamente e tareanan habitual no ta suficiente si un problema persistente ta laga hende sin solucion durante lunanan. E ta recorda tur hende si, cu e responsabilidad final pa e maneho di e departamento ta keda cerca e minister encarga.
Den su preguntanan dirigi na Minister di Husticia, e ta plantea un miho coordinacion entre DIMAS y Censo, un arreglo di emergencia pa casonan afecta y un plazo concreto pa elimina e retrasonan. Tambe e ta pidi splicacion pakico e problema ainda no a wordo resolve structuralmente, mientras, segun su carta, Ombudsman di Aruba tambe a trece esaki na atencion publico.
“Nos no por sigui manda hende purba online sin perspectiva di un cita. Mester tin un intervencion efectivo, responsabilidad cla y un fecha pa solucion. E personanan aki no por sigui paga e prijs di un sistema cu no ta duna nan e servicio cu nan mester,” Heyliger a conclui.
