Minister Geoffrey Wever, di Finansa, Asunto Economico y Sector Primario, y Minister Melvin Wyatt-Ras, di Salubridad, Asuntonan Social, Cuido di Adulto Mayor y Maneho di Adiccion a firma un acuerdo di cooperacion entre Directie Ouderenzaken (DOZ) y Departamento di Agricultura, Cria y Pesca (Santa Rosa) cu tin como meta principal pa stimula participacion activo di adulto mayor pa medio di iniciativanan riba tereno di agricultura, cria y pesca.
Pa medio di e acuerdo di cooperacion aki, DOZ y Santa Rosa lo:
- Organisa actividadnan cu ta contribui na e bienestar fisico, social y mental di adultonan mayor.
- Ehecuta proyectonan den cooperacion estrecho cu adultonan mes. Di e forma aki ta haci uzo di e conocemento y experiencia valioso di adultonan mayor y ta stimula nan participacion activo den nos comunidad.
- Stimula proyectonan pa adultonan mayor y hobennan pa stimula e comunicacion entre e diferente generacionnan. Durante di e proyectonan aki, e conocemento, experiencia, norma y balornan cultural por wordo traspasa di un generacion pa otro.
- Cera acuerdonan di cooperacion entre instancianan gubernamental, instancianan educativo, gruponan social y cultural y sector priva pa asina por ehecuta proyectonan duradero, conhuntamente cu adultonan mayor.
- Enfoca riba e contribucion valioso di adultonan mayor den e comunidad di Aruba y lo stimula nan participacion activo den proyectonan pa nos comunidad.
Na e momentonan aki ya tin diferente proyecto den desaroyo:
- Un Fiesta di Cunucu pa Nos Grandinan
Den conexion cu celebracion di luna di adulto mayor (1 di october) y dia mundial di alimentacion (16 di october), lo organisa un actividad na Santa Rosa. Durante di e actividad aki, diferente grupo di adulto mayor cu ta organisa actividadnan social y recreativo lo pa presente pa bende cuminda, obra di man, mata y mucho mas. Den forma aki nan por recauda fondo pa por haci mas actividad pa adultonan mayor. E intencion di e fiesta aki ta pa e bira un actividad anual pa adultonan mayor y cu participacion di adultonan mayor.
- Hardin rond di casnan di cuido pa adulto mayor.
Haci uzo di naturalesa pa e bienestar di adulto mayor den casnan di cuido. E hardinan aki ta forma espacionan trankil pa topa otro, espacio trankil pa habitantenan, dunador di cuido, personal y boluntario. E habitantenan ta wordo encurasha pa ta activo den e hardin. E proyecto aki wordo ehecuta cu casnan di cuido y lo wordo ahusta a base di posibilidad y mobilidad di e habitantenan.
- Proyecto di pesca pa adultonan mayor y hobennan
E idea tras di e proyecto aki ta pa adultonan mayor y hobennan cu tin interes pa haya sa mas di pesca (y pesca tradicional), bini hunto y siña conoce otro den pratica di piscamento na lama. Adultonan mayor por contribui grandemente na e conocemento di nos hobennan pa locual cu ta trata e materia, techinicanan y historia di piscamento.
E acuerdo di cooperacion entre DOZ y Santa Rosa lo demonstra cu un cooperacion estrecho entre diferente departamento di gobierno, adultonan mayor, organisacionnan den sector priva y instancianan envolvi den e guia y cuido pa adultonan mayor, lo conduci na mihor bienestar fisico, social y mental di adultonan mayor den nos comunidad door di enfoca riba un bida activo pa adultonan mayor, alegria den tur fase di bida y comunicacion entre generacionnan basa riba comprendemento y respect mutuo.
