Cu gran satisfaccion, Gobierno di Aruba ta ricibi e resultado positivo di Fondo Monetario Internacional (IMF) den su Staff Concluding Statement di e 2025 Article IV Mission pa Reino Hulandes y Aruba.
IMF ta aprecia e prestacion economico di Aruba, finansa publico saludabel, y principalmente e politica cu ta enfoca riba bienestar, prosperidad comparti y fortificacion di e poder di compra di e pueblo.
“Cu gran satisfaccion por mira cu un institucion manera IMF ta reconoce explicitamente cu e politica di Gabinete AVP-Futuro ta basa riba distribucion husto di ingreso y inversionnan cu ta mehora e bida diario di nos pueblo,” segun Prome Minister Mike Eman. “Nos ta sigui construi un economia cu no solamente ta crece, pero cu ta crece pa tur hende.”
Diversificacion y balor comparti
IMF ta indica cu Aruba ta traha cu exito riba e desaroyo continuo di un modelo di turismo High-Value, Low-Impact (HVLI) cu ta genera “balor halto comparti pa e pueblo” y ta fortifica e producto Aruba.
Ademas, IMF ta expresa su apoyo pa e iniciativa di “Promising Sectors”—manera agricultura, economia circular, industria creativo, economia di conocemento y energia renobabel—cu ta ofrece un caminda sostenibel pa diversificacion economico.
“Nos direccion ta cla,” segun Premier Eman. “Nos kier pa e prosperidad cu ta genera cu turismo y di e sectornan nobo, keda comparti ampliamente. Esey ta e esencia di e bon comun cu nos ta persigui.”
Politica fiscal responsabel cu husticia social
IMF ta receptivo pa e prome paso di Gobierno pa un presupuesto orienta riba meta di maneho, den cual e gastonan publico ta alinea cu e prioridadnan dirigi riba bienestar, prosperidad y poder di compra. IMF ta menciona explicitamente e aumento di pensioen, e ampliacion di cobertura di medicina, y e sosten pa famianan cu ta ricibi asistencia social como resultado positivo di e maneho aki.
“E hecho cu e IMF ta reconoce cu nos ta inverti den nos pueblo — den nos grandinan, famia y cuido di salud— ta mustra cu Aruba no ta scohe pa un contabilidad sin sentido y sin vision, sino pa un maneho cu ta inclui tur hende, pa e bon comun,” Prome Minister a declara.
Inversion den futuro: e fondo di inversion
IMF ta mira lesnan positivo cu por saca for di proyectonan bao di e Fondo di Desaroyo Aruba (FDA), cu por sirbi como ehempel pa e creacion di e futuro fondo di inversion.
IMF ta enfatisa riba e importancia di un structura cla, bon gobernacion y coordinacion pa uza fondonan publico di manera eficiente y pa alinea e prioridadnan nacional.
“E fondo di inversion lo ta un instrumento pa sigui construi structuralmente riba nos futuro,” Eman a bisa. “IMF ta subraya precisamente loke nos ta defende: inversion cu vision, responsabilidad y resultado — pa e bon comun di Aruba.”
Aruba riba bon caminda
Cu e evaluacion positivo aki, IMF ta confirma cu e maneho di Aruba ta bay den e direccion corecto:
- un fuerte crecemento economico,
- desempleo den reduccion,
- finansa publico saludabel,
- y tur esaki ta conecta cu un maneho enfoca riba bienestar creciendo di e pueblo.
“Aruba ta demostra cu recuperacion economico y husticia social por bay man den man,” Prome Minister Eman a conclui. “Nos ta sigui traha pa un futuro den cual tur hende ta progresa, pasobra Aruba ta di nos tur.”
