Awe mainta Hues a dicta sentencia den e caso penal cu Ministerio Publico a cuminsa contra e homber S.K. (59). Fiscal a hay’e culpabel di 8 acusacion y a exigi 10 aña di prison.
SOLO DI PUEBLO por a compronde cu Hues ta haya S.K., culpabel di tur e 8 acusacionnan y a confirma e exigencia di Fiscal, 10 aña di prison. Hues no a persigui S.K. pa tres pistol y tampoco e mas di 600 balanan cu tabata den kluis.
CULPABEL DI A ABUSA DI DOS MUCHA MUHER
Hues a bisa cu en total tin 8 acusacion contra S.K.
** 6 acusacion, ta tocante e abuso sexual di e dos mucha muher R. y W. durante un tempo largo.
** E di 7 acusacion ta tocante di posecion di pornografia di mucha.
** E di 8 acusacion ta tocante e posecion di 6 armanan di candela y mas di 600 bala cayente.
Hues a bisa cu Fiscal a exigi 10 aña di prison pa S.K. Hues a bisa cu e acusado S.K. ta desmenti tur acusacion di abuso di e muchanan y ta bisa cu no por kere e declaracion di e muchanan. S.K. a bisa cu el a cumpra e pornografia di mucha pero no por a habri esakinan.
Hues ta haya S.K. culpabel di a abusa di e muchanan R. y W. Hues a bisa cu e ta haya e declaracion di e dos muchanan confiabel. Hues a mustra cu e muchanan R. y W. a declara cu nan tabata hunto ora cu S.K. a abusa di nan.
Pa loke ta pornografia di mucha, Hues a mustra cu S.K. a bisa cu el a cumpra nan pero no por a habri e filenan. Hues no ta kere S.K. Hues a bisa cu e ta haya S.K. culpabel di tabatin pornografia di muhca.
NO CULPABEL PA 3 ARMA
Pa loke ta posecion di 6 arma di candela y balanan, Hues a mustra cu 5 pistol ta di club di tiro y e revolver ta di un amigo cu a fayece y cu e documentonan di e arma ainda no ta regla. Hues ta haya cu S.K. tin permiso pa arma y no ta castiga S.K. pa 3 arma. Esaki ta e pistolnan cu tabata warda den kluis hunto cu e balanan. Hues ta haya cu esakinan ta cumpli cu e reglanan poni den e permiso.
Hues ta haya S.K. culpabel pa e dos pistolnan cu tabata pafor di e kluis pasobra aki S.K. no a cumpli cu e reglanan di e permiso, esta cu armanan di candela mester ta warda den kluis. Hues ta haya S.K. culpabel tambe pa e revolver, pasobra ainda e formalisacion di e permiso di e revolver no ta cla.
CASTIGO DI 10 AÑA DI PRISON
Pa cu e castigo, Hues a bisa cu e ta haya cu S.K. a tacha integridad di e muchanan. Esaki ta afecta e muchanan den nan bida. Hues a mustra cu e mayornan di e muchanan R. y W. a declara den Corte cu nan yiu a keda afecta y cu nan ta hayando tratamento.
Hues a sigui bisa cu pa combati pornografia di mucha, mester actua contra esnan cu ta cumpra e videonan.
Pa loke ta e armanan di candela, Hues a bisa cu no ta acceptable cu S.K. a pone 2 pistool pafor di e kluis. Hues a mustra cu tin video caminda ta mira e mucha R. tabata hunga cu un arma. Esaki ta sumamente peligroso.
Na opinion di Hues, e exigencia di Fiscal ta na su lugar. El a condena S.K. na 10 aña di prison, kitando e tempo cu S.K. ta sera den KIA.
Hues a aproba e demanda di daño di 9654 florin di banda di mayornan di R y 3575 florin di banda di mayornan di W. Hues a pone e medida di pago contra S.K. pa paga esakinan.
