Prome Minister di Aruba, mr. Mike Eman, a expresa su satisfaccion y orguyo pa e progreso cu Aruba ta logra den cuadro di cooperacion den Reino Hulandes. Segun Eman, e contacto directo y sincero cu Hulanda pa restablece un vision di un Reino cu ta funciona pa tur su partinan, ta cumpli su meta y ta dunando resultado positivo.
Durante e conferencia di embahadornan y diplomaticonan di Reino staciona den region, cu a tuma dos dia, Aruba a comparti su plan strategico y su direccion pa un desaroyo integral, unda crecemento economico ta conecta cu bienestar social.
Gobierno di Aruba ta trahando pa crea un pais cu su desaroyo economico ta traduci den un bida miho pa nos hendenan, cu bon cas, bon skol, y bon barionan. Esaki no ta solamente un soño, sino un plan concreto cu awe ta haya su reconocemento internacional. Premier Eman a referi na e rapport recient di Fondo Monetario Internacional (IMF) cu a confirma cu e rumbo cu Aruba a tuma ta esun corecto, indicando cu esaki ta esencial pa stabilidad sostenibel tanto economico como social.
Segun Eman, e embahadornan y diplomaticonan di Reino a expresa nan apoyo pa e direccion di Gobierno di Aruba, y ta compromete pa sigui habri portanan di cooperacion, tanto na Hulanda como den e paisnan unda nan ta representa Reino.
Ta importante pa mantene e relacionnan diplomatico fuerte, specialmente den un mundo unda e instabilidad ta crece. Mester corda cu nos relacionnan exterior ta un di nos defensa mas fuerte. Tur embahada y embahador di Reino ta aliado den proteha e bienestar y progreso di Aruba.
Eman a expresa su preocupacion riba e tono negativo y antagonista cu algun politiconan local ta adopta contra di Hulanda:
Ta incomprendibel cu politiconan cu poco tempo pasa tabata goberna Aruba, awo ta bay riba un campaña cu por pone nos reputacion internacional na riesgo. E mes rapport di S&P a indica cu si Aruba ta adopta un posicion di antagonismo contra Hulanda, esaki por causa un downgrading pa nos isla. Esaki ta pone nos paspoort Hulandes den peligro, netamente pa motibonan politico.
Premier Eman a enfatisa cu e acercamento di Gobierno AVP–Futuro riba e tema di e Rijkswet ta basa riba cooperacion, respet y vision pa e bon comun. Riba e ultimo aki, Gobierno ta organisando un conferencia internacional riba e tema, pa amplia e dialogo y fortifica e vision pa e meta grandi aki.
Gobierno ta trahando pa un futuro unda progreso economico ta traduci den progreso pa comunidad. Esaki ta e corason di nos vision, y ta un tema cu ta ricibi apoyo amplio di embahadornan.
E conferencia internacional lo sirbi como un plataforma pa Aruba sigui comparti su vision sostenibel y reforsa su posicion como un pais chikito cu un gran proposito den Reino.
