Tur hende ta stima nan yiu, yiu ta un bendicion di Dios, nos tur kier lo miho pa nos yuinan, nos ta traha duro pa educacion y mantencion di nos yuinan, pa nan tin dak riba cabes y cuminda riba mesa y panja na curpa.
Pero tin algo masha importante cu hopi hende ta lubida ta e bida spiritual di nos hubentud especialmente nan relacion cu Dios, pasobra tin un mandato di Dios para scirbi den Efesionan 6:4 bisando : Y boso tatanan no provoca boso yuinan na rabia, ma lanta nan den disiplina y instruccion di Senjor.
Cada mayor tin e deber di lanta su yiu den caminda di Senjor, caminda tin lesamento di bijbel, oracion, baymento di iglesia, y mas cu tur cos pa e sinja e palabra di Dios for di chiki cual semper lo yuda e hoben den su crecemento.
Proverbionan 22:6 ta bisa;Instrui e mucha den e caminda cu e mester cana, hasta ora e bira bieu e lo no aparta su mes for di dje.
Palabra di Dios ta bolbe bisa nos tur hopi cla: Sea sobrio,sea alerta. Boso adversario e diabel ta cana rond manera un leon cu ta grunja buscando ken e por debora.
Pa falta di conocemento di e palabra di Dios nos hobennan ta cay den inmoralidad:
Diabel ta ganja nan cu identidad falso,
Hinca den nan cabes cu nan por ta homber y muher den mesun curpa.
Aunke nan mente y curason y sanger no por wordo cambia.
Pero ta sinja nan con haci danjo y cambio na nan curpa cu a wordo crea den imagen y semehansa di Dios pa asina troce e berdad cu mentira.
“Wow” pa falta di conocemento di e palabra di Dios hopi hoben ta cay den gara di droga, cana cu arma,drenta den gang y comete crimen.
Ora nos nota con leu nos hubentud ta for di Dios, nos como mayor tin cu arepenti, y busca Senjor di henter nos curason, pa asina nos por alcansa nos yuinan pa Cristo door di cambio cu nan ta mira den nos bida.
E hubentud urgentemente mester wordo sinja pa:
Biba santo y puro.( Salmo 119:9)
Sirbi Dios. ( Jeremias 1:4-8).
Sea un bon ehempel den nan conducta ( 1 Timoteo 4:12).
Y tur esey por sosode ora mayornan tuma nan responsabilidad y sinja nan yiunan e caminda di Senjor for di chikito.
Bruheria y Idolatria ta crece cada dia , y tin hopi hende ta dirigi nos hobennan den e caminda robes , enbes di mustra nan cu Cristo Hesus ta e unico caminda di e berdad y e bida.
Corda nos hobennan cu e ladron ta bini solamente pa horta, pa mata y pa destrui, y Cristo Hesus a bini pa duna bida y bida na abundancia.( Juan 10:10).
Ningun caminda den Bijbel no tin un evangelio pa mucha y hobennan, hobennan y muchanan mester somete nan mes na e palabra di Dios puro y berdadero, pasobra ta un palabra di Dios tin, y ta esey ta e berdad y e ta igual pa tur hende.
Ora lus yega den nos bida e ta yega pa henter nos curpa y no pa un parti di nos curpa so. Esey ta nifica cu e palabra di Dios tin cu mantene e hoben riba e caminda di Dios, esey ta tur cos.
Si nos no uni y haci tur esfuerso pa nos hubentud entrega nan bida na Cristo, e enemigo lo mantene nan den scuridad.
Mirando e maldad cu ta bay rond, nos mester dirigi nos hubentud na Senjor.
Sinceramente, Pastor Marcel Balootje
